मुंबई: स्टँड-अप कॉमेडीच्या विश्वात लोकप्रिय असलेल्या प्रणीत मोरे आणि त्याच्या शोमध्ये आलेला प्रेक्षक हिमांशू जांग्रा हे सध्या एका मोठ्या कायदेशीर वादात अडकले आहेत. गुरुग्राममध्ये आयोजित एका कार्यक्रमादरम्यान, ३७० रुपयांच्या बिर्याणीचा संदर्भ देऊन हिमांशूने महिलांच्या संमतीबाबत अत्यंत खालच्या पातळीवर जाऊन विधान केले होते. धक्कादायक बाब म्हणजे, प्रणीत मोरेने या आक्षेपार्ह विधानाला विरोध न करता स्टेजवरून हसून दाद दिली. याचा व्हिडिओ सोशल मीडियावर पसरल्यानंतर सोशल मीडियावर अनेकांनी तीव्र संताप व्यक्त केला आहे.
महिला आयोगाची धडक कारवाई
या प्रकरणाची दखल घेत राष्ट्रीय महिला आयोगाने प्रणीत मोरे आणि हिमांशू जांग्रा यांना अधिकृत समन्स बजावले आहे. आयोगाच्या अध्यक्षा विजया रहाटकर यांनी या प्रकरणावर कडक भूमिका घेतली असून, दोषींना 22 जून 2026 रोजी दिल्लीत हजर राहण्याचे आदेश दिले आहेत. तसेच, हरियाणा पोलिसांना पुढील 7 दिवसांच्या आत या घटनेचा सविस्तर अहवाल सादर करण्यास आणि तातडीने कठोर पावले उचलण्यास सांगितले आहे. आयोगाच्या मते, महिलांच्या सन्मानाशी आणि सुरक्षिततेशी तडजोड करणे कोणत्याही परिस्थितीत खपवून घेतले जाणार नाही.
सायबर पोलिसांचीही कारवाई आणि आयोजकांची चौकशी
केवळ महिला आयोगच नाही, तर महाराष्ट्र सायबर सेलनेही या प्रकरणाची गंभीर दखल घेतली आहे. सोशल मीडियावर महिलांविषयी अत्यंत अश्लील आणि प्रक्षोभक मजकूर पसरवल्याप्रकरणी प्रणीत मोरे आणि हिमांशू जांग्रा आणि मानवी मृतदेहाबाबत अश्लील टिप्पणी केल्या प्रकरणी डॉ. सेजल पवारसह संबंधित व्यक्तींवर गुन्हे दाखल करण्यात आले आहेत. त्याचबरोबर, या संपूर्ण कार्यक्रमाचे आयोजन करणाऱ्या आयोजकांवर आणि ज्या ठिकाणी हा शो झाला, त्या ठिकाणच्या व्यवस्थापनावरही जाऊन आता पोलिस अधिक चौकशी करत आहेत.
भविष्यात असे होऊ नये यासाठी आता कडक नियमावली आखली जाणार आहे. या वादामुळे आधीच हिमांशू जांग्राला त्याच्या नोकरीवरून काढून टाकण्यात आले असून, आता कायदेशीर चौकशीमुळे प्रणीत मोरेच्या अडचणीत मोठी वाढ झाली आहे.
