Pune News : उरुळी कांचन, (पुणे) : केडगाव येथील बहुचर्चित असणाऱ्या बेकायदेशीर गर्भलिंग निदान प्रकरणाच्या पार्श्वभूमीवर, पुणे जिल्हा प्रशासन आणि आरोग्य विभागाने ‘सर्जिकल स्ट्राईक’ केला आहे. या विशेष तपासणी मोहिमेत रुग्णालयांचे विविध कारनामे आणि गंभीर अनियमितता उघडकीस आल्या आहेत. Pune News
या कारवाईअंतर्गत उरुळी कांचन येथील नामांकित ‘माहेर हॉस्पिटल’चे डॉ. तुकाराम मोटे याला अखेर पोलिसांनी बेड्या ठोकल्या आहेत. तर दुसरीकडे, दौंडमधील ‘लवंगिरे हॉस्पिटल’ मध्ये वैद्यकीय गर्भपात (MTP) कायद्याचे उघड उघड उल्लंघन झाल्याचे निष्पन्न झाल्याने, तिथले सोनोग्राफी मशीन सील करण्यात आले आहे. या कारवाईमुळे बेकायदेशीरपणे स्त्री भ्रूणहत्येला खतपाणी घालणाऱ्या डॉक्टरांचे धाबे दणाणले आहेत. Pune News
या प्रकरणात सहभाग निष्पन्न झालेले एकूण 3 डॉक्टर सध्या हुलकावणी देत फरार आहेत. यामध्ये उरुळी कांचन येथील डॉ. सुंदरम कदम (रा. उरुळी कांचन), डॉ. मंदार सुरेश माळी (रा. किकवी, ता. भोर), व डॉ. स्वाती लवंगिरे (रा. दौंड) हे तीन डॉक्टर सध्या फरार आहेत. या तिन्ही फरार डॉक्टरांच्या अटकेसाठी पोलिसांनी विशेष पथके रवाना केली असून, त्यांचा शोध घेतला जात आहे. तर अटक करण्यात आलेला उरुळी कांचनचा डॉ. तुकाराम मोटे याच्यावर कोर्टात न्यायालयीन प्रक्रिया आणि कायदेशीर कडक कारवाई सुरू करण्यात आली आहे. Pune News
केडगाव येथील गर्भलिंग निदान रॅकेट उघड झाल्यानंतर जिल्हा प्रशासनाने तालुक्यातील सर्व सरकारी व खासगी रुग्णालयांची कडक तपासणी करण्याचे आदेश दिले होते. त्यानुसार जिल्हा शल्यचिकित्सक डॉ. नागनाथ यम्पल्ले यांच्या मार्गदर्शनाखाली आरोग्य विभागाच्या 4 विशेष पथकांनी तालुक्यात धाडी टाकल्या. 25 सोनोग्राफी केंद्रे, 20 गर्भपात (MTP) केंद्रे, 19 नर्सिंग होमची कसून तपासणी करण्यात आली. या तपासणी दरम्यान अनेक बड्या हॉस्पिटल्समध्ये कागदपत्रांची अफरातफर आणि गंभीर त्रुटी आढळून आल्या आहेत. Pune News
दरम्यान, आरोग्य पथकाने दौंड येथील लवंगिरे हॉस्पिटलवर छापा टाकला असता, तिथे वैद्यकीय गर्भपाताशी संबंधित आवश्यक नोंदी व कागदपत्रांमध्ये अत्यंत गंभीर गैरव्यवहार आढळला. पीसीपीएनडीटी (PCPNDT) आणि एमटीपी (MTP) कायद्याचा धज्जा उडवल्याप्रकरणी यवत पोलीस ठाण्यात गुन्हा दाखल करण्यात आला असून, रुग्णालयातील सोनोग्राफी मशीन तात्काळ जप्त करून सील ठोकण्यात आले आहे. या गुन्ह्याची मुख्य सुत्रधार असणारी स्त्रीरोगतज्ज्ञ डॉ. स्वाती लवंगिरे ही गुन्हा दाखल होताच पोलिसांना गुंगारा देऊन पसार झाली आहे. Pune News
