रायगड: रायगड जिल्ह्यात पावसाचा जोर मोठ्या प्रमाणावर वाढला आहे. या मुसळधार पावसामुळे निर्माण होणारे संभाव्य धोके ओळखून, रायगड जिल्हा प्रशासनाने एक महत्त्वाचा निर्णय घेतला आहे. पोलादपूर आणि महाबळेश्वरला जोडणाऱ्या आंबेनळी घाटात ३ जुलैपासून ते ७ जुलै २०२६ या कालावधीत सर्व वाहनांची ये-जा पूर्णपणे बंद ठेवण्याचे आदेश जिल्हाधिकारी किसन जावळे यांनी दिले आहेत.
सह्याद्रीच्या कुशीत असलेला हा घाट रस्ता निसर्गरम्य असला तरी पावसाळ्यात तो धोकादायक ठरतो. काही दिवसांपूर्वीच या मार्गावर २ वेळा दरडी कोसळल्याच्या घटना घडल्या होत्या. हवामान विभागाने पुढील ४ दिवस रायगड परिसरात मुसळधार पावसाचा अंदाज वर्तवला आहे. अशा वातावरणात पुन्हा दरडी कोसळणे किंवा रस्त्यावर दगड येणे यांसारख्या दुर्घटना घडून जीवितहानी होण्याची शक्यता आहे. ही जोखीम टाळण्यासाठीच प्रशासनाने घाटातील वाहतुकीवर निर्बंध लादले आहेत.
सध्या आंबेनळी घाटात सुरक्षेची महत्त्वाची कामे सुरू आहेत. यामध्ये दरड कोसळू नये म्हणून संरक्षण भिंती बांधणे, रस्त्याच्या कडेला क्रॅश बॅरिअर्स बसवणे आणि पावसाच्या पाण्याचा निचरा योग्य पद्धतीने व्हावा यासाठी विशेष व्यवस्था करणे, यांसारख्या कामांचा समावेश आहे. पावसाळी हवामानामुळे ही कामे करणे आव्हानात्मक बनले आहे. अशा स्थितीत वाहतूक सुरू ठेवल्यास कामगारांचा आणि प्रवाशांचा जीव धोक्यात येऊ शकतो. त्यामुळे ही सुरक्षा कामे वेगाने व सुरक्षितपणे पूर्ण करण्यासाठी रस्ता बंद ठेवणे महत्वाचे असल्याचे प्रशासनाने स्पष्ट केले आहे.
