पुणे: पुण्यातील बुधवार पेठ परिसरात दोन तरुणांना गुन्हा दाखल करण्याची भीती दाखवून २ हजार रुपयांची खंडणी उकळल्याप्रकरणी दोन पोलिसांविरोधात गुन्हा दाखल करण्यात आला आहे. या घटनेचा व्हिडिओ सोशल मीडियावर व्हायरल झाल्यानंतर हा प्रकार उघडकीस आला. गुन्हा दाखल होताच संबंधित दोन्ही पोलीस कर्मचारी फरार झाले असून, त्यांचा शोध सुरू आहे.
या प्रकरणातील आरोपी पोलीस अंमलदार विवेक पाटील आणि राहुल दाभाडे अशी आहेत. दोघेही गेल्या वर्षभरापासून फरासखाना पोलीस ठाण्यात कार्यरत होते.
याप्रकरणी हडपसरमधील तुपेवस्ती येथे राहणाऱ्या २४ वर्षीय तरुणाने फरासखाना पोलीस ठाण्यात तक्रार दाखल केली आहे. ही घटना २९ जून रोजी रात्री सुमारे ११.३० वाजता बुधवार पेठेतील एटीएम गल्ली परिसरात घडली.
पोलिसांनी दिलेल्या माहितीनुसार, फिर्यादी आणि त्याचा मित्र बुधवार पेठ परिसरात फिरत असताना विवेक पाटील आणि राहुल दाभाडे यांनी त्यांना अडवले. “येथे काय करता?” अशी विचारणा करून त्यांना गुन्हा दाखल होईल आणि कोर्टात जावे लागेल, अशी भीती दाखवण्यात आली. त्यानंतर दोघांकडून त्यांच्या इच्छेविरुद्ध एका महिलेच्या नावावर असलेल्या स्कॅनरवर २ हजार रुपये ऑनलाइन भरून घेण्यात आले.
घटनेनंतर भीतीपोटी दोन्ही तरुणांनी याबाबत कोणाकडेही तक्रार केली नव्हती. मात्र, या प्रकाराचा व्हिडिओ सोशल मीडियावर व्हायरल झाल्यानंतर पोलीस प्रशासनाने त्याची दखल घेतली. त्यानंतर संबंधित तरुणांचा शोध घेऊन त्यांची चौकशी करण्यात आली. चौकशीत दोन्ही पोलिसांनी पैसे घेतल्याचे स्पष्ट झाल्यानंतर त्यांच्याविरोधात खंडणीचा गुन्हा दाखल करण्यात आला.
या प्रकरणाची माहिती देताना पोलीस उपायुक्त कृषीकेश रावले यांनी व्हिडिओच्या आधारे संपूर्ण प्रकार समोर आल्याचे सांगितले. सध्या आरोपी पोलिसांचा शोध सुरू असून, या प्रकरणाचा पुढील तपास सहाय्यक पोलीस निरीक्षक स्वराज पाटील करत आहेत.
