पुणे: पुणे जिल्ह्यातील शिरूर तालुक्यात सणसवाडी येथील एका औद्योगिक वसाहतीत माणुसकीला काळिमा फासणारी अत्यंत भयानक घटना घडली आहे. ‘वेस्टर्न इंडिया फोर्ज प्रा. लि.’ या कंपनीत रात्रपाळीत काम करत असताना, एका कामगाराचा त्याच्याच सहकाऱ्याच्या अघोरी मस्करीमुळे दुर्दैवी अंत झाला आहे. या घटनेने संपूर्ण परिसरात खळबळ उडाली असून सर्वत्र हळहळ व्यक्त होत आहे.
मिळालेल्या माहितीनुसार, ३० जून २०२६ रोजी पहाटे ५ वाजण्याच्या सुमारास ही घटना घडली. आरोपी कामगार बिकीकुमार भाईलाल सरोज याने नरेश सुलेंद्र यादव (वय ४२) या सहकाऱ्याच्या गुदद्वारात कॉम्प्रेसरचा हाय-प्रेशर पाइप टाकला. कॉम्प्रेसरमधील अतिउच्च दाबाची हवा अचानक शरीरात गेल्यामुळे नरेश यादव यांचे पोट गंभीररीत्या फुगले आणि त्यांची प्रकृती चिंताजनक झाली. त्यांना तत्काळ उपचारांसाठी रुग्णालयात नेण्यात आले, परंतु वैद्यकीय उपचार सुरू असतानाच त्यांचा मृत्यू झाला.
याप्रकरणी नरेश यांचे मेहुणे संतोषकुमार किशोर यादव यांनी शिक्रापूर पोलीस ठाण्यात रीतसर तक्रार दाखल केली आहे. पोलिसांनी आरोपी बिकीकुमार सरोज याच्यावर गुन्हा दाखल केला असून, सध्या या प्रकरणाचा सखोल तपास सुरू आहे.
तपास अधिकारी तथा सहाय्यक पोलीस निरीक्षक संतोष कारंडे यांनी सांगितले की, घटनेमागील नेमका हेतू काय होता याप्रकरणी अधिक तपास केला जात आहे.
