बारामती, (पुणे) : पुणे जिल्हाधिकारी कार्यालयाची खोटी ओळख निर्माण करून, अस्तित्वात नसलेल्या अधिकाऱ्याच्या नावे बनावट इलेक्ट्रॉनिक रेकॉर्ड व आदेश तयार करून ते बारामती तहसीलला पाठवण्यात आल्याचा गंभीर प्रकार नुकताच उघडकीस आला आहे. या सायबर गुन्हेगारीप्रकरणी बारामती शहर पोलीस ठाण्यात गुन्हा दाखल करण्यात आला आहे. याप्रकरणी महसूल नायब तहसीलदार स्वाती सुभाष गायकवाड (वय -52, रा. बारामती) यांनी सरकारतर्फे फिर्याद दिली आहे.
पोलिसांनी दिलेल्या माहितीनुसार, 21 एप्रिल 2026 रोजी दुपारी दोन वाजण्याच्या सुमारास बारामती तहसील कार्यालयाच्या अधिकृत शासकीय ई-मेल आयडीवर “mahsulpune2@protonmail.com” या संशयास्पद ई-मेल आयडीवरून एक मेल प्राप्त झाला. या ई-मेलसोबत “उपविभागीय अधिकारी कार्यालय आदेश आणि तहसील कार्यालय आदेश प्रमाणे नाव नोंदणी करून स्थळ पाहणी करणे बाबत” या विषयाचे एक पत्र आणि काही संलग्न कागदपत्रे जोडलेली होती.
सदर पत्रावर “जिल्हाधिकारी कार्यालय, पुणे (महसूल शाखा)” असा उल्लेख होता. तसेच त्यावर “पे. या. पदनूर, तहसीलदार महसूल शाखा, जिल्हाधिकारी कार्यालय, पुणे” असे नाव, पदनाम आणि हुबेहूब बनावट सही करण्यात आली होती. या बनावट पत्रामध्ये मौजे म्हसोबाचीवाडी (ता. बारामती) येथील गट क्रमांक 1 मधील 1 हेक्टर 20 आर या क्षेत्राबाबत गोविंद कोकरे यांच्या नावाची नोंद घेऊन समक्ष वहिवाटीच्या हद्दीची पाहणी करण्याबाबत बारामती तहसीलला सूचना देण्यात आल्या होत्या.
धक्कादायक बाब म्हणजे, या पत्रात थेट महसूल मंत्री, महाराष्ट्र राज्य यांच्या कार्यालयाकडील कथित ‘ई-ऑफिस’ संदर्भ क्रमांकाचा उल्लेख करून हे पत्र अगदी खरे असल्याचे भासवण्यात आले होते. हे ई-मेल आणि पत्र संशयास्पद वाटल्याने बारामतीचे कार्यतत्पर तहसीलदार स्वप्निल रावडे यांनी या प्रकरणाची पडताळणी सुरू केली. त्यांनी तात्काळ पुणे जिल्हाधिकारी कार्यालयातील मूळ महसूल शाखा तहसीलदार उमाकांत कडनोर यांच्याशी दूरध्वनीवरून संपर्क साधून खात्री केली.
यावेळी mahsulpune2@protonmail.com” हा जिल्हाधिकारी कार्यालयाचा अधिकृत ई-मेल आयडी नाही, पुणे जिल्हाधिकारी कार्यालयात “पे. या. पदनूर” नावाचे कोणतेही कडक अधिकारी कार्यरतच नाहीत, तर जिल्हाधिकारी कार्यालयातून असे कोणतेही पत्र निर्गमित करण्यात आलेले नाही. असे समजले. हा बनाव उघड होताच, तहसीलदार स्वप्निल रावडे यांनी कार्यालयीन आदेश (जावक क्र. आस्था/कावी/२६३/२०२६, ता. १९/०६/२०२६) अन्वये नायब तहसीलदार स्वाती गायकवाड यांना तात्काळ कडक फौजदारी गुन्हा दाखल करण्याचे आदेश दिले.
दरम्यान, अज्ञात आरोपींनी संगनमताने शासकीय कार्यालयाचा, पदाचा आणि अधिकाराचा गैरवापर करून बनावट दस्तऐवज तयार केले आणि शासकीय अभिलेखावर प्रभाव पाडण्याचा प्रयत्न केला. या फिर्यादीवरून बारामती शहर पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे. तपास महिला पोलीस हवादार गोरे करीत आहेत.
