सासवड, (पुणे) : सासवड-बोपगाव रस्त्यावरील कानिफनाथ कमानीजवळ गाडीचा हॉर्न वाजवला म्हणून तीन जणांनी मिळून एका तरुणावर प्राणघातक हल्ला केल्याची घटना घडली. शनिवारी (ता. 06) रात्री नऊ वाजण्याच्या सुमारास हि घटना घडली. याप्रकरणी तिघांवर सासवड पोलीस ठाण्यात गुन्हा दाखल करण्यात आला आहे.
लक्ष्मण शिवाजी बालगुडे (वय-32, व्यवसाय- नोकरी, रा. मुर्टी, ता. बारामती) असे मारहाण झालेल्या तरुणाचे नाव आहे. तर गोट्या अक्षय खेनट उर्फ संभाजी रा. पिंपळे ता. पुरंदर, गणेश नवनाथ कामथे, प्रसाद मारुती कामथे दोघे (रा. चांबळी ता. पुरंदर) असे मारहाण करणाऱ्या तिघांची नावे आहेत. याबाबत बालगुडे यांनी सासवड पोलीस ठाण्यात फिर्याद दिली.
पोलिसांनी दिलेल्या माहितीनुसार, शनिवारी रात्री नऊ वाजण्याच्या सुमारास लक्ष्मण बालगुडे हे सासवड-बोपगाव रस्त्यावरून त्यांच्या मोटारसायकलवरून जात होते. बोपगाव गावच्या हद्दीतील चौकात कानिफनाथ कमानीजवळ आले असता, त्यांनी समोरील वाहनाला हॉर्न वाजवला. मात्र, हॉर्न वाजवल्याचा राग मनात धरून समोरून येणाऱ्या आरोपींनी आपली मोटारसायकल फिर्यादी बालगुडे यांच्या मोटारसायकलला थेट आडवी मारली आणि रस्ता अडवला.
गाडी आडवी मारल्यानंतर आरोपींनी कोणतीही शहानिशा न करता लक्ष्मण बालगुडे यांना गाडीवरून खाली खेचले आणि शिवीगाळ सुरू केली. वाद वाढत गेल्यानंतर आरोपी गोला उर्फ अक्षय संभाजी खेनट (उर्फ गोट्या) याने रस्त्याकडेला पडलेला एक मोठा दगड हातात घेतला आणि थेट लक्ष्मण यांच्या डोक्यात जोरात मारला. या हल्ल्यात लक्ष्मण यांच्या डोक्याला गंभीर दुखापत झाली.
दरम्यान, त्याच वेळी त्याचे इतर दोन साथीदार गणेश कामथे आणि प्रसाद कामथे यांनी लक्ष्मण यांना जमिनीवर पाडून हाताने व लाथाबुक्क्यांनी बेदम मारहाण केली. मारहाण केल्यानंतर जिवे मारण्याची धमकी दिली. आणि आरोपी घटनास्थळावरून पसार झाले. सदर गुन्ह्याचा पुढील तपास पोलीस हवालदार होळकर करीत आहेत.
