मुंबई: शासकीय कामासाठी लाचेची मागणी करणाऱ्या महावितरणच्या एका सहायक अभियंत्याला नवी मुंबई लाचलुचपत प्रतिबंधक विभागाने (एसीबी) रंगेहात अटक केली आहे. तळोजा येथील महाराष्ट्र राज्य विद्युत वितरण कंपनीच्या कार्यालयात कार्यरत असलेले सहायक अभियंता रोहित मोरे यांना ५० हजार रुपयांची लाच स्वीकारताना एसीबीच्या पथकाने सापळा रचून अटक केली. या कारवाईमुळे महावितरण विभागात एकच खळबळ उडाली आहे.
मिळालेल्या माहितीनुसार, तक्रारदार यांच्या ‘पी. एन. इलेक्ट्रिकल’ या कंपनीच्या कामासाठी आवश्यक असलेला ‘फिजिबिलिटी रिपोर्ट’ तयार करून देण्याच्या बदल्यात रोहित मोरे यांनी ५० हजार रुपयांच्या लाचेची मागणी केली होती. संबंधित काम नियमांनुसार होत असतानाही लाचेची मागणी करण्यात आल्याने तक्रारदाराने थेट एसीबीकडे धाव घेतली.
तक्रारदाराने नवी मुंबई लाचलुचपत प्रतिबंधक विभागाकडे याबाबत अधिकृत तक्रार दाखल केली. तक्रारीची प्राथमिक पडताळणी केल्यानंतर एसीबीने सापळा रचण्याचा निर्णय घेतला. त्यानुसार तळोजा येथील महावितरण कार्यालयाच्या परिसरात सापळा लावण्यात आला.
तक्रारदाराकडून ठरलेली ५० हजार रुपयांची रक्कम स्वीकारत असतानाच एसीबीच्या अधिकाऱ्यांनी रोहित मोरे यांना रंगेहात पकडले. त्यानंतर त्यांना ताब्यात घेऊन पुढील कायदेशीर कारवाई करण्यात आली. या कारवाईत लाचेची संपूर्ण रक्कमही जप्त करण्यात आली.
या प्रकरणी रोहित मोरे यांच्याविरुद्ध भ्रष्टाचार प्रतिबंधक कायद्यानुसार गुन्हा दाखल करण्यात आला आहे. या लाचखोरीच्या प्रकरणात इतर कोणाचा सहभाग होता का, तसेच यापूर्वीही त्यांनी अशा प्रकारे लाचेची मागणी केली होती का, याचाही तपास एसीबीकडून सुरू आहे. शासकीय कार्यालयांमध्ये भ्रष्टाचाराविरोधात कठोर कारवाई सुरूच राहील, असा संदेश या कारवाईतून देण्यात आल्याचे एसीबीच्या अधिकाऱ्यांनी स्पष्ट केले आहे.
