डॉ. अशोक बालगुडे
सातारा : सातारा जिल्हा मध्यवर्ती सहकारी बँकेच्या पंचवार्षिक निवडणुकीसाठी खासदार उदयनराजे भोसले यांनी शुक्रवारी उमेदवारी अर्ज दाखल केला. बँकेची निवडणूक राजकारणविरहित व्हावी, या भूमिकेचा त्यांनी पुनरुच्चार केला. भाजपच्या नेतृत्वाखाली निवडणूक लढविण्याबाबत वरिष्ठ नेत्यांचा आग्रह असल्याच्या प्रश्नावर त्यांनी, “सगळंच पंतप्रधान, मुख्यमंत्र्यांना विचारायचं का?” असा प्रतिप्रश्न केला.
बँकेच्या निवडणुकीत राजकीय हस्तक्षेपाबाबत विचारलेल्या प्रश्नावर उदयनराजेंनी स्थानिक परिस्थितीचा विचार करण्याची गरज व्यक्त केली. “ग्राऊंड रिअॅलिटी बघा ना,” असे सांगताना राजकारणाचा शिरकाव झालेल्या काही जिल्हा बँकांच्या कारभाराचा त्यांनी संदर्भ दिला.
काही दिवसांपूर्वीही उदयनराजेंनी सातारा जिल्हा बँकेची निवडणूक राजकारणविरहित पद्धतीने पार पाडण्याचे आवाहन केले होते. दरम्यान, मंत्री जयकुमार गोरे यांनी ही निवडणूक शिवेंद्रसिंहराजे भोसले यांच्या नेतृत्वाखाली भाजप लढविणार असल्याचे म्हटले होते. त्याच पार्श्वभूमीवर उदयनराजेंना प्रश्न विचारण्यात आला होता.
उमेदवारी अर्ज दाखल केल्याने निवडणूक प्रक्रियेत त्यांची भूमिका स्पष्ट झाली असून, राजकारणविरहित निवडणुकीच्या त्यांच्या भूमिकेचा पुढील टप्प्यात काय परिणाम होतो, याकडे लक्ष लागले आहे.
