पुणे : पुणेकरांचे आवडते पर्यटनस्थळ आणि ऐतिहासिक वारसा असलेल्या किल्ले सिंहगडावर आता सीसीटीव्ही कॅमेऱ्यांची नजर राहणार आहे. पर्यटकांची सुरक्षितता, वाहनांची वर्दळ, गर्दीचे नियोजन आणि ऐतिहासिक वास्तूंचे संरक्षण करण्यासाठी गडावर सीसीटीव्ही यंत्रणा बसविण्याचे काम सुरू झाले आहे. पुणे वन विभाग आणि संयुक्त वनव्यवस्थापन समिती, घेरा सिंहगड यांच्या पुढाकारातून ही यंत्रणा उभारण्यात येत आहे. डिसेंबर २०२६ च्या पहिल्या आठवड्यात ही व्यवस्था कार्यान्वित होण्याची शक्यता आहे.

सीसीटीव्ही यंत्रणेच्या पहिल्या टप्प्यात सिंहगड वाहन तपासणी नाका, घाट रस्त्यावरील चेकपोस्ट क्रमांक २, वाहनतळ, पुणे दरवाजा, पायरी मार्ग, नरवीर तानाजी मालुसरे स्मारक आणि छत्रपती राजाराम महाराज समाधीस्थळ अशा महत्त्वाच्या सात ठिकाणी कॅमेरे बसविण्याचे नियोजन करण्यात आले आहे.
सिंहगडावर शनिवार, रविवार आणि सार्वजनिक सुट्ट्यांच्या दिवशी पर्यटकांची मोठी गर्दी होते. गेल्या काही वर्षांत दुर्गप्रेमींसह सहकुटुंब गडावर येणाऱ्या पर्यटकांची संख्याही वाढली आहे. त्यामुळे घाट रस्त्यावर अनेकदा वाहतूक कोंडी निर्माण होते. अशा गर्दीच्या वेळी वाहनांचे नियोजन आणि पर्यटकांच्या सुरक्षिततेचा प्रश्न निर्माण होतो.

गडावरील ऐतिहासिक वास्तू, तटबंदी आणि नैसर्गिक परिसराची नासधूस रोखणे हे प्रशासनासमोरील महत्त्वाचे आव्हान आहे. काही पर्यटकांकडून होणारे गैरवर्तन रोखण्यासाठीही प्रभावी उपाययोजनांची गरज आहे. सीसीटीव्ही यंत्रणेमुळे अशा घटनांवर लक्ष ठेवणे आणि आवश्यक ती कारवाई करणे अधिक सोपे होणार आहे.
नवीन सीसीटीव्ही यंत्रणेमुळे गडावर येणाऱ्या वाहनांची संख्या, त्यांचे नोंदणी क्रमांक आणि पर्यटकांच्या हालचालींवर लक्ष ठेवता येणार आहे. उपद्रव शुल्क भरून प्रवेश करणाऱ्या वाहनांची पडताळणी करणेही यामुळे सोपे होईल.
विशेषतः शनिवार, रविवार आणि सार्वजनिक सुट्ट्यांच्या दिवशी गर्दीच्या काळात वाहतूक नियंत्रण, सुरक्षाव्यवस्था आणि ऐतिहासिक वास्तूंचे संरक्षण करण्यासाठी या यंत्रणेचा उपयोग होणार आहे.
या प्रकल्पासाठी उपद्रव शुल्कातून जमा झालेल्या निधीचा वापर करण्यात येणार आहे. त्यामुळे सिंहगडावरील सुरक्षा व्यवस्था अधिक प्रभावी होण्यास आणि गडावर शिस्त राखण्यास मदत होण्याची अपेक्षा व्यक्त केली जात आहे.






