पिंपरी : जमिनीला तारेचे कुंपण घालण्याच्या कारणावरून झालेल्या वादात बाप-लेकाने मिळून एका तरुणाला मारहाण करत धारदार लोखंडी हत्याराने डोक्यात आणि छातीवर वार करून जखमी केल्याची घटना मुळशी तालुक्यातील मारुंजी येथे घडली. गुरुवारी (ता. १९) दुपारी एकच्या सुमारास हा प्रकार घडला. याप्रकरणी सौरव सखाराम बुचडे (वय २८, रा. शिवारवस्ती, संतकृपा निवास, मारुंजी) यांनी हिंजवडी पोलीस ठाण्यात फिर्याद दिली आहे. त्यानुसार संभाजी बुचडे आणि त्यांचा मुलगा शेखर संभाजी बुचडे (दोघेही रा. शिवारवस्ती, मारुंजी) यांच्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी सौरव बुचडे यांना त्यांच्या जमिनीला तारेचे कुंपण घालायचे होते. यासाठी त्यांनी शेजारील मिळकतधारक संभाजी बुचडे यांना बोलावले होते. त्यावेळी संभाजी बुचडे हे मुलगा शेखर याच्यासह तेथे आले.
यानंतर संभाजी यांनी सौरव यांना हाताने मारहाण केली, तर शेखर याने धारदार लोखंडी हत्याराने त्यांच्या छातीवर आणि डोक्यात वार करून जखमी केले. तसेच त्यांना शिवीगाळही केली. याप्रकरणी हिंजवडी पोलीस ठाण्यात गुन्हा दाखल करण्यात आला असून, पोलीस उपनिरीक्षक कांदे पुढील तपास करत आहेत.







