सासवड, ता. 02 : कर्जाच्या हप्त्याची चौकशी( Saswad) करण्यासाठी गेलेल्या फायनान्सच्या कर्मचाऱ्याला कुऱ्हाडीच्या दांड्याने बेदम मारहाण करीत “कोयत्याने मारून टाकतो” अशी धमकी दिल्याची घटना घडली आहे. सासवड पोलीस ठाण्याच्या हद्दीतील इनामके मळा परिसरात हि घटना घडली. याप्रकरणी दोघांवर गुन्हा दाखल करण्यात आला आहे.
मिलींद महादेव इनामके, अक्षय महादेव इनामके (दोन्ही रा. इनामकेमळा, सासवड ता. पुरंदर, जि. पुणे) असे गुन्हा दाखल करण्यात आला आहे. याप्रकरणी तन्मय अनिल काळे (व्यवसाय – इक्वीटास स्मॉल फायनान्स बँकेमध्ये नोकरी, रा. 495 नवजिवन सोसायटी, सहकार नगर नं -1 पद्मावती, सासवड, ता. पुरंदर) यांनी फिर्याद दिली आहे.
पोलिसांनी दिलेल्या माहितीनुसार, फिर्यादी काळे हे बँकेकडून कर्ज घेतलेल्या ग्राहकांकडून हप्ते वसूल करण्याचे काम करतात. हडपसर ते पुरंदर दरम्यानच्या ग्राहकांची जबाबदारी त्यांच्याकडे आहे. 21 फेब्रुवारी रोजी सकाळी सुमारे अकरा वाजता ते सासवडकडे निघाले होते. दुपारी अडीच वाजता तो अक्षय इनामके यांच्या घरी हप्त्याबाबत चौकशीसाठी गेले होते.
इनामके यांनी हुंडाई एलॅन्ट्रा (MH 12 PC 6226) या कारचे कर्ज घेतले असून हप्ता थकीत होता. मात्र, घरी भेटलेल्या त्यांचा भाऊ मिलिंद महादेव इनामके यांनी “आमच्याकडे अशी गाडी नाही” असा दावा केला. यानंतर फोनवर अक्षय इनामके यांच्याशी संपर्क साधण्यात आला. त्यांनी सध्या केरळमध्ये असल्याचे सांगत दोन दिवसांत हप्ता भरण्याचे आश्वासन दिले.
प्रकरण वाढले आणि मिलिंद इनामके यांनी बँकेच्या कलेक्शन मॅनेजरशी फोनवर वाद घालत असताना संतापाच्या भरात काळे यांच्या कानशिलात लगावली. त्यानंतर गोठ्यातील कुऱ्हाडीच्या दांड्याने पाठ, कंबर, मांड्या, पोटरी, घोटे आणि उजव्या हाताच्या मनगटावर बेदम मारहाण करण्यात आली. “तुला कोयत्यानेच मारून टाकतो” अशी धमकीही देण्यात आली.
फोनवरून वरिष्ठ अधिकारी विनवण्या करत असतानाही मारहाण सुरूच असल्याचे सांगितले जाते. अखेर शाखा व्यवस्थापक कपिल दिलीप पोमण यांच्या हस्तक्षेपानंतर काही वेळाने कर्मचाऱ्याला सोडण्यात आले. जखमी काळे यांना तत्काळ ससून रुग्णालयात उपचारासाठी दाखल करण्यात आले. मोबाईलमधील रेकॉर्ड केलेल्या कॉन्फरन्स कॉलमध्ये अक्षय इनामके यांनी “त्याला सोडू नको, धरून ठेव” असे सांगितल्याचेही समोर आले आहे.
दरम्यान, या घटनेनंतर पीडित कर्मचाऱ्याने सासवड पोलीस ठाण्यात तक्रार दाखल केली असून पुढील तपास सासवड पोलीस करीत आहेत.
