लोणी काळभोर, ता. 28 : पुणे-सोलापूर महामार्गाच्या रुंदीकरणासाठी प्रस्तावित भूसंपादनाच्या मोजणीला कुंजीरवाडी येथील ग्रामस्थ, बाधित शेतकरी, व्यावसायिक व रहिवाशांनी हरकत घेतली आहे. 28 सप्टेंबर रोजी होणारी मोजणी स्थगित करून प्रथम सर्व संबंधितांची संयुक्त बैठक घ्यावी, अशी मागणी उपजिल्हाधिकारी तथा भूसंपादन अधिकारी, महाराष्ट्र राज्य पायाभूत सुविधा विकास महामंडळ आणि भूमी अभिलेख विभागाकडे निवेदनाद्वारे करण्यात आली आहे.
पुणे-सोलापूर महामार्गाच्या रुंदीकरणासाठी कुंजीरवाडी येथे भूसंपादन मोजणीची नोटीस देण्यात आली आहे. मात्र, मोजणीपूर्वी कोणत्या गट क्रमांकातील किती जमीन संपादित होणार, महामार्गाची प्रस्तावित रुंदी किती असेल, रस्त्याच्या दोन्ही बाजूंना किती क्षेत्र जाणार आणि बाधितांना कोणत्या पद्धतीने मोबदला मिळणार, याची स्पष्ट माहिती देण्यात यावी, अशी मागणी ग्रामस्थांनी केली आहे.
2002-03 मध्ये झालेल्या जुन्या रुंदीकरणाचा मुद्दाही ग्रामस्थांनी उपस्थित केला आहे. त्यावेळी काही शेतकऱ्यांची मूळ भूसंपादनापेक्षा अधिक जमीन रस्त्यात गेल्याचा, काहींना अत्यल्प मोबदला मिळाल्याचा तर काहींना अद्याप मोबदला मिळालेला नसल्याचा दावा निवेदनात करण्यात आला आहे. जुन्या भूसंपादनाची मोजणी, नोंदी, प्रत्यक्ष ताबा आणि मोबदल्याची शासनाने तपासणी करून प्रलंबित मोबदला देण्याची मागणी करण्यात आली आहे.
तसेच रस्त्यासाठी जमीन गेल्यानंतरही काही शेतकऱ्यांच्या सातबारा उताऱ्यावर संबंधित क्षेत्राची योग्य नोंद किंवा कपात झालेली नसल्याचे ग्रामस्थांचे म्हणणे आहे. त्यामुळे जुन्या भूसंपादनाची प्रथम तपासणी करून त्यानंतरच सातबारा नोंदीबाबत कार्यवाही करावी, अशी मागणी करण्यात आली आहे. नवीन भूसंपादनामुळे शेतकरी, दुकानदार, व्यावसायिक आणि रहिवाशांच्या उपजीविकेवर होणारा परिणाम, तसेच बाधित होणाऱ्या दुकानांसाठी पुनर्वसन, पर्यायी व्यवस्था आणि मोबदल्याबाबत शासनाने भूमिका स्पष्ट करावी, अशी मागणीही निवेदनातून करण्यात आली आहे.
दरम्यान, हडपसर ते यवत या संपूर्ण पट्ट्यातील बाधित शेतकरी, व्यावसायिक व रहिवाशांची संयुक्त बैठक घेऊन प्रकल्पाचा नकाशा, प्रस्तावित रस्त्याची रुंदी, गटनिहाय संपादन क्षेत्र आणि मोबदल्याची प्रक्रिया स्पष्ट केल्यानंतरच पुढील मोजणी व भूसंपादनाची कार्यवाही करावी, अशी भूमिका ग्रामस्थांनी मांडली आहे.
