Crime News: नाशिक : नाशिक शहरातून एक अत्यंत संतापजनक आणि माणुसकीला काळीमा फासणारी घटना समोर आली आहे. पतीपासून वेगळ्या राहणाऱ्या आणि पदरात केवळ 3 ते 4 महिन्यांचे तान्हे बाळ असलेल्या एका हतबल महिलेची दोन लाख रुपयांना विक्री करण्यात आली आहे. इव्हेंट मॅनेजमेंटमध्ये चांगली नोकरी देण्याचे आमिष दाखवून दोन महिला एजंटांनी या पीडितेचा सौदा केला. या प्रकरणात सातपूर पोलिसांनी अत्यंत धाडसी कामगिरी करत 300 ग्रामस्थांच्या वेढ्यातून या महिलेची सुखरूप सुटका केली आहे. Nashik crime
सातपूर येथील कार्बन नाका परिसरात राहणाऱ्या या महिलेची ओळख राणी आणि भागी नावाच्या दोन महिलांशी झाली होती. त्यांनी पीडितेला कामाचे लालच दाखवून 27 फेब्रुवारी रोजी कारमध्ये बसवले आणि मालेगावमार्गे नांदगावला नेले. तिथे गेल्यावर या महिलांनी नवनाथ खिरडकर नावाच्या तरुणाकडून दोन लाख रुपये घेतले आणि पीडितेचे त्याच्याशी बळजबरीने लग्न लावून दिले. पीडितेने या लग्नाला विरोध केला होता, मात्र तिचे कोणीही ऐकले नाही. 28 फेब्रुवारी रोजी या महिलेने संधी मिळताच आपल्या आईला फोन करून सर्व हकीगत सांगितली. त्यानंतर घाबरलेल्या पालकांनी तातडीने सातपूर पोलीस ठाण्यात धाव घेतली.
घटनेचे गांभीर्य लक्षात घेऊन पोलीस उपायुक्त किशोर काळे यांनी तातडीने कारवाईचे आदेश दिले. पोलीस पथक जेव्हा नांदगाव तालुक्यातील जातेगाव येथे पोहोचले, तेव्हा तिथे धक्कादायक परिस्थिती निर्माण झाली होती. गावातील सुमारे 300 लोकांनी पोलिसांना घेराव घातला. आम्ही दोन लाख रुपये देऊन या मुलीशी लग्न केले आहे, त्यामुळे आमचे पैसे परत करा किंवा त्या एजंट महिलांना पकडून द्या, अशी आक्रमक भूमिका गावकऱ्यांनी घेतली. परिस्थिती हाताबाहेर जात असल्याचे पाहून नांदगाव पोलिसांची जादा कुमक तिथे मागवण्यात आली.
अखेर सातपूर आणि नांदगाव पोलिसांनी मोठ्या धैर्याने जमावाचा प्रतिकार मोडीत काढला आणि पीडित महिलेची सुटका केली. या घटनेमुळे जिल्ह्यात महिलांची विक्री करणारी मोठी टोळी सक्रिय असल्याचे स्पष्ट झाले असून पोलीस आता त्या दोन फरार महिला एजंटांचा शोध घेत आहेत.
