पुणे : अँटिलिया स्फोटक प्रकरण आणि मनसुख हिरेन हत्या प्रकरणातील मुख्य आरोपी आणि माजी पोलीस अधिकारी सचिन वाझे यांना एनआयए विशेष न्यायालयाने मोठा दिलासा देत जामीन मंजूर केला आहे. 13 मार्च 2021 पासून म्हणजे जवळपास साडेपाच वर्षांहून अधिक काळ तुरुंगात घालवल्याची बाब मुख्यत्वे विचारात घेऊन कोर्टाने हा निर्णय घेतला आहे.
माजी पोलीस अधिकारी सचिन वाझे यांना एनआयए विशेष न्यायालयाने जामीन अटी व नियमांसह मंजुर केला आहे.सचिन वाझे यांच्याकडे पासपोर्ट असल्यास तो तात्काळ त्यांना एनआयएकडे जमा करावा लागेल.या प्रकरणातील महत्त्वाच्या साक्षीदारांची साक्ष नोंदवून पूर्ण होईपर्यंत वाझेंना मुंबई, नवी मुंबई, ठाणे, रायगड आणि पालघर या 5 जिल्ह्यांमध्ये राहण्यास किंवा प्रवेश करण्यास मनाई करण्यात आली आहे.सुनावणीच्या दिवशी न्यायालयात उपस्थित राहण्यासाठी त्यांना या जिल्ह्यांत येण्याची मुभा असेल; मात्र सुनावणी संपताच त्यांना तात्काळ निर्धारित ठिकाणी परतावे लागेल.
कोर्टाने जामीन अर्ज मंजूर करताना आरोपपत्रातील विविध पुरावे, बेकायदेशीर कारवाया प्रतिबंधक कायद्यांतर्गत लावलेले आरोप आणि मनसुख हिरेन हत्येशी संबंधित परिस्थितीजन्य पुराव्यांची सखोल पाहणी केली. तसेच या प्रकरणातील इतर आरोपींना आधीच मिळालेला जामीन हेदेखील एक कारण ठरले. न्यायालयाने स्पष्ट केले की, प्रथमदर्शनी आरोप निश्चित करणे आणि जामीन फेटाळणे या दोन पूर्णपणे वेगवेगळ्या बाबी आहेत.
या संपूर्ण प्रकरणात एनआयएकडून 14,000 हून अधिक पानांचे विशाल आरोपपत्र दाखल करण्यात आले असून त्यात तब्बल 320 साक्षीदारांचा समावेश आहे. त्याशिवाय मोठ्या प्रमाणावर डिजिटल व इलेक्ट्रॉनिक पुरावे सादर करण्यात आले आहेत. दीर्घकाळ चालणारी कायदेशीर प्रक्रिया आणि वाझेंचा कोठडीतील कालावधी लक्षात घेऊन विशेष न्यायालयाने त्यांना अटींवर जामीन देण्याचा निर्णय घेतला आहे.
