शिरूर : कारेगाव (ता.शिरूर) येथील साईनगर परिसरात पाण्याच्या प्लांटमध्ये कामावर गेलेल्या एका 39 वर्षीय व्यक्तीचा पिस्तुलातून गोळी झाडून खून करण्यात आल्याची धक्कादायक घटना मंगळवारी (ता.29) सकाळी उघडकीस आली. या घटनेमुळे कारेगाव परिसरात खळबळ उडाली असून, रांजणगाव एमआयडीसी पोलिसांनी अज्ञात व्यक्तीविरुद्ध खुनाचा गुन्हा दाखल केला आहे.
या प्रकरणी रांजणगाव पोलिसांनी दिलेल्या माहितीनुसार,हामजा उस्मान शेख (वय 39,सध्या रा. कारेगाव-साईनगर,ता.शिरूर,मूळ रा.धानोरा काळे,ता.पूर्णा,जि.परभणी) हे नेहमीप्रमाणे मंगळवारी (ता.29) सकाळी कामावर गेले होते. सकाळी सुमारे सव्वा सहा ते पावणेसात वाजण्याच्या दरम्यान कारेगाव हद्दीतील साईनगर येथील विकास नवले यांच्या इमारतीलगत असलेल्या ‘समु इंटरप्रायजेस एक्वा रिच’ या पाण्याच्या प्लांटमध्ये अज्ञात व्यक्तीने त्यांच्यावर पिस्तुलातून गोळी झाडली. गोळीबारात गंभीर जखमी झालेल्या हामजा शेख यांचा मृत्यू झाला. त्यानंतर या घटनेची माहिती पोलिसांना मिळताच रांजणगाव एमआयडीसी पोलिसांनी घटनास्थळी धाव घेतली. या प्रकरणी मृताची पत्नी अबिताबी हामजा शेख (वय 37) यांनी दिलेल्या फिर्यादीवरून अज्ञात आरोपीविरुद्ध विविध कलमांच्या अंतर्गत व शस्त्र अधिनियम कलम अन्वये रांजणगाव एमआयडीसी पोलीस ठाण्यात गुन्हा दाखल करण्यात आला आहे.
घटनेचे गांभीर्य लक्षात घेऊन पुणे ग्रामीणचे पोलीस अधीक्षक,अपर पोलीस अधीक्षक,शिरूर विभागाचे उपविभागीय पोलीस अधिकारी तसेच रांजणगाव पोलीस ठाण्याचे पोलीस निरीक्षक यांनी घटनास्थळी भेट देऊन पाहणी केली.या प्रकरणाचा पुढील तपास सहायक पोलीस निरीक्षक अनिल मोरडे करीत आहेत.गोळीबाराचे नेमके कारण काय,हल्लेखोर कोण होता, तसेच हल्लेखोराने कोणत्या कारणातून हा हल्ला केला, याचा तपास पोलीस करीत आहेत.
घटनास्थळावरील परिस्थिती, उपलब्ध पुरावे आणि इतर तांत्रिक बाबींच्या आधारे पोलिस आरोपीचा शोध घेत आहेत. दरम्यान,या घटनेमुळे कारेगाव-साईनगर परिसरात भीतीचे वातावरण निर्माण झाले असून, अज्ञात हल्लेखोराचा लवकरात लवकर छडा लावून कठोर कारवाई करावी, अशी मागणी स्थानिकांकडून होत आहे
