पुणे: पुरंदर (ता. पुरंदर) येथे प्रस्तावित आंतरराष्ट्रीय विमानतळाच्या भूसंपादनासाठी सुमारे 6 हजार कोटी रुपयांचा निधी लागणार असून, हा निधी कर्जाच्या माध्यमातून उभारण्याचा निर्णय राज्य सरकारने घेतला आहे. हे कर्ज गृहनिर्माण व नागरी विकास महामंडळाकडून (हुडको) घेण्याचा विचार असून, यासंदर्भातील प्रस्ताव मंगळवारी होणाऱ्या राज्य मंत्रिमंडळाच्या बैठकीत मांडण्यात येण्याची शक्यता आहे. (Purandar Airport News)
जिल्ह्यातील पुरंदर (Purandar Airport Latest News) तालुक्यातील सात गावांमध्ये हे विमानतळ प्रस्तावित असून, त्यासाठी सुमारे 3 हजार एकर जमिनीचे संपादन करण्यात येणार आहे. यापूर्वी जिल्हा प्रशासनाने भूसंपादनासाठी अंदाजे 5 हजार कोटी रुपयांचा खर्च अपेक्षित असल्याचा प्रस्ताव राज्य सरकारकडे सादर केला होता.
मात्र, मुख्यमंत्री देवेंद्र फडणवीस यांनी नुकतीच शेतकऱ्यांशी चर्चा करताना जमिनीचा वाढीव एकरी दर देण्यासह परताव्यापोटी देण्यात येणाऱ्या 10 टक्के रकमऐवजी वाढीव जमीन देण्याची घोषणा केली आहे. या निर्णयामुळे भूसंपादनाचा खर्च सुमारे एक हजार कोटी रुपयांनी वाढून 6 हजार कोटी रुपयांवर गेला आहे.
या वाढीव खर्चासाठी राज्य सरकारने कर्ज उभारण्याचा निर्णय घेतला असून, मंत्रिमंडळाची मान्यता मिळाल्यानंतर प्रस्ताव हुडकोकडे पाठविण्यात येणार आहे. कर्ज मंजूर झाल्यानंतर साधारण पंधरा दिवसांच्या आत शेतकऱ्यांना मोबदला देण्याची प्रक्रिया सुरू केली जाईल. मोबदला वितरित झाल्यानंतरच प्रत्यक्ष भूसंपादनाची कार्यवाही सुरू करण्यात येईल, असे जिल्हा प्रशासनाने स्पष्ट केले आहे.
