पुणे: येत्या ७ जुलै २०२६ रोजी जगद्गुरू संत तुकाराम महाराज यांची पालखी देहू येथून पंढरपूरकडे मार्गस्थ होणार आहे. या वारीसाठी देहू नगरी सज्ज होत असतानाच, एक अत्यंत गंभीर आणि धक्कादायक प्रकार समोर आला आहे. श्रीक्षेत्र देहू येथील इंद्रायणी नदीपात्रात हजारो मासे मृत अवस्थेत तरंगताना आढळले आहेत. यामुळे धार्मिक वातावरणात चिंतेचे सावट पसरले असून, नदी प्रदूषणाचा प्रश्न पुन्हा एकदा गंभीरपणे समोर आला आहे.
सध्या देहूमध्ये भाविकांची मोठी गर्दी जमू लागली आहे. अशा महत्त्वाच्या काळात नदीपात्रात मृत माशांचे ढीग साचलेले दिसणे, हे प्रशासनाच्या स्वच्छतेच्या दाव्यांना छेद देणारे आहे. अनेक मृत माशांच्या शरीरावर किडे पडले असून, त्यांच्या कुजण्यामुळे परिसरात मोठी दुर्गंधी पसरली आहे. याचा त्रास भाविक आणि स्थानिक नागरिकांना सहन करावा लागत आहे. दरवर्षी नदी स्वच्छतेच्या कामासाठी लाखो रुपयांचा निधी खर्च केला जातो, मग अशी दुर्दैवी परिस्थिती का ओढवते, असा संतप्त प्रश्न आता वारकरी विचारत आहेत.
मात्र, पालखी सोहळ्यासाठी लाखो वारकरी येथे येणार आहेत. त्यांच्या आरोग्यासाठी हे पाणी अत्यंत घातक ठरू शकते. त्यामुळे प्रशासनाने केवळ मलमपट्टी न करता, नदी प्रदूषणास जबाबदार असणाऱ्या घटकांवर त्वरित कठोर कारवाई करावी, अशी मागणी जोर धरू लागली आहे.
