पुणे : दररोज हजारो प्रवाशांची वर्दळ असलेल्या स्वारगेट एसटी बस स्थानकावरील स्नॅक्स सेंटरवर अन्न व औषध प्रशासनाने (एफडीए) धडक कारवाई केली आहे. शनिवारी करण्यात आलेल्या अचानक तपासणीत कॅन्टीनमधील स्वच्छतेबाबत गंभीर त्रुटी आढळून आल्याने प्रशासनाने हे कॅन्टीन तातडीने बंद करण्याचे आदेश दिले आहेत.
प्रवाशांच्या आरोग्याशी संबंधित बाबींची पडताळणी करण्यासाठी एफडीएच्या विशेष पथकाने स्वारगेट बस स्थानकातील कॅन्टीनची पाहणी केली. यावेळी स्वयंपाकघर आणि अन्न साठवणुकीच्या ठिकाणी मोठ्या प्रमाणात अस्वच्छता आढळून आली. कॅन्टीनमधील फरश्या तुटलेल्या आणि घाणेरड्या अवस्थेत असल्याचे निदर्शनास आले. तसेच खाद्यपदार्थ योग्य सुरक्षिततेशिवाय उघड्यावर ठेवले जात असल्याचेही आढळले.
तपासणीदरम्यान स्वयंपाकघरातील स्वच्छतेचा अभाव, अन्न साठवण्याची अयोग्य पद्धत आणि परिसरातील अस्वच्छ परिस्थिती यामुळे प्रवाशांच्या आरोग्याला धोका निर्माण होऊ शकतो, असे एफडीएच्या अधिकाऱ्यांनी नमूद केले. या पार्श्वभूमीवर कॅन्टीन चालकाला तात्काळ केंद्र बंद करण्याचे लेखी आदेश देण्यात आले आहेत.
प्रशासनाने स्पष्ट केले आहे की, संपूर्ण परिसराची स्वच्छता, तुटलेल्या फरश्यांची दुरुस्ती आणि अन्न साठवणुकीची योग्य व्यवस्था केल्यानंतरच कॅन्टीन पुन्हा सुरू करण्यास परवानगी दिली जाईल. तोपर्यंत हे स्नॅक्स सेंटर बंदच राहणार आहे.
या कारवाईनंतर अन्न व औषध प्रशासनाने शहरातील इतर हॉटेल, कॅन्टीन आणि खाद्यपदार्थ विक्रेत्यांनाही नियमांचे काटेकोर पालन करण्याचा इशारा दिला आहे. नागरिकांच्या आरोग्याशी तडजोड करणाऱ्या कोणत्याही आस्थापनाविरुद्ध कठोर कारवाई करण्यात येईल, असे प्रशासनाने स्पष्ट केले आहे.
दरम्यान, प्रवासादरम्यान खाद्यपदार्थ खरेदी करताना स्वच्छतेची काळजी घेण्याचे आवाहनही प्रशासनाकडून करण्यात आले आहे.
