उरुळी कांचन, (पुणे) : घराशेजारी बांधकामाच्या विटा का टाकल्या, या क्षुल्लक कारणावरून सख्ख्या भावाने आणि त्याच्या मुलाने मिळून धाकट्या भावाच्या कुटुंबावर विटांनी हल्ला केल्याची घटना घडली. याप्रकरणी उरुळी कांचन पोलिस ठाण्यात दोघांविरुद्ध गुन्हा दाखल करण्यात आला आहे. रविवारी (ता. 14) सकाळी साडेसात वाजण्याच्या उरुळी कांचन (ता. हवेली) गावचे हद्दीतील गोळे वस्ती येथील तुळजाभवानी मंदिराशेजारी हि घटना घडली.
सुनील फकीरा शेंडगे (वय 40, धंदा मजुरी रा. तुळजाभवानी मंदिर शेजारी गोळे वस्ती, उरुळी कांचन ता. हवेली) असे मारहाण झालेल्याचे नाव आहे. याबाबत सुनील शेंडगे यांनी उरुळी कांचन पोलीस ठाण्यात फिर्याद दिली. त्यानुसार पोलिसांनी मोठा भाऊ अनिल फकिरा शेंडगे
व पुतण्या निखिल अनिल शेंडगे यांच्यावर गुन्हा दाखल केला आहे. .
पोलिसांनी दिलेल्या माहितीनुसार, सुनील शेंडगे हे आपल्या घरासमोर असताना, त्यांचा सख्खा मोठा भाऊ अनिल शेंडगे हा तिथे आला. घराशेजारी टाकलेल्या बांधकामाच्या विटा पाहून “तुम्ही तुमच्या बांधकामाच्या विटा माझ्या घराशेजारी का टाकल्या? या ठिकाणी विटा टाकायच्या नाहीत!” असे म्हणून सुनील व त्यांची पत्नी नंदा शेंडगे यांना शिवीगाळ करण्यास सुरुवात केली.
वाद वाढत गेल्यानंतर अनिल शेंडगे याने खाली पडलेली एक वीट हातात घेतली आणि थेट सुनील यांच्यावर हल्ला केला. त्याने ती वीट सुनील यांच्या डोक्यात पाठीमागील बाजूस जोरात मारली, ज्यामुळे सुनील यांच्या डोक्याला गंभीर दुखापत झाली. त्याच वेळी पुतण्या निखिल शेंडगे हा तिथे धावून आला. त्यानेही शेंडगे दांपत्याला शिवीगाळ करत करण्यास सुरुवात केली.
यावेळी निखिलने खाली पडलेली वीट घेऊन सुनील यांची पत्नी नंदा शेंडगे यांच्याकडे भिरकावली. ही वीट नंदा यांच्या उजव्या गालाच्या वरील बाजूला जोरात लागल्याने जखमी झाल्याचे फिर्यादीत म्हटले आहे. याप्रकरणी शेंडगे यांनी दिलेल्या तक्रारीनुसार दोघा बापलेकावर गुन्हा दाखल करण्यात आला आहे. तपास पोलीस हवालदार रवींद्र गोसावी हे करीत आहेत.
