पुणे: पुणे शहरातील वाढती वाहतूक कोंडी, बेशिस्त वाहनचालक, अतिक्रमणे आणि नियमभंगाच्या घटनांच्या पार्श्वभूमीवर शहर पोलीस आयुक्तालयाने वाहतूक शाखेतील अधिकाऱ्यांच्या तात्पुरत्या पदस्थापना केल्या आहेत. वाहतूक व्यवस्थेत सुधारणा करण्याच्या उद्देशाने हा फेरबदल करण्यात आला आहे.
शहरात लोणी काळभोर, लोणीकंद आणि काळेपडळ हे तीन नवे वाहतूक विभाग सुरू करण्यात आले असून, त्यानंतर पुण्यात एकूण ३३ वाहतूक विभाग कार्यरत झाले आहेत. या सर्व विभागांमध्ये प्रभारी, सहायक प्रभारी आणि इतर अधिकाऱ्यांच्या नव्याने पदस्थापना करण्यात आल्या आहेत. पोलीस आयुक्त अमितेशकुमार यांच्या आदेशानुसार सोमवारी (२० जुलै) हा फेरबदल करण्यात आला असून, संबंधित अधिकाऱ्यांना तातडीने नवीन पदस्थापनेच्या ठिकाणी कार्यभार स्वीकारण्याचे निर्देश देण्यात आले आहेत.
मात्र, शहरातील वाहतुकीची समस्या केवळ अधिकारी बदलून सुटणारी नसल्याचे चित्र आहे. पुण्यात वाहनांची संख्या झपाट्याने वाढत असताना त्यानुसार रस्ते आणि पायाभूत सुविधांचा विकास झालेला नाही. प्रमुख चौकांमधील वाहतूक कोंडी, सिग्नलचे उल्लंघन, बेशिस्त पार्किंग, फेरीवाल्यांचे अतिक्रमण, रिक्षा आणि पीएमपीएमएल बसथांब्यांवरील गोंधळ तसेच अरुंद रस्त्यांवरील वाढता ताण यामुळे नागरिकांना दररोज वाहतूक कोंडीचा सामना करावा लागत आहे.
याशिवाय अनेक चौकांमध्ये वाहतूक पोलिसांची अपुरी संख्या, सिग्नल यंत्रणांतील बिघाड, रस्त्यांवरील खड्डे, सुरू असलेली विकासकामे आणि नियमभंग करणाऱ्यांवर सातत्यपूर्ण कारवाईचा अभाव यामुळे वाहतूक व्यवस्थेवर अतिरिक्त ताण निर्माण होत आहे.
प्रशासनाच्या मते, या पदस्थापनांमुळे वाहतूक व्यवस्थेला नवी दिशा मिळू शकते. मात्र त्याचे यश केवळ अधिकाऱ्यांच्या बदलावर अवलंबून नसून प्रभावी नियोजन, पुरेसे मनुष्यबळ, आधुनिक तंत्रज्ञानाचा वापर आणि सातत्यपूर्ण अंमलबजावणी यावरही अवलंबून असेल. त्यामुळे या फेरबदलानंतर पुणेकरांना वाहतूक कोंडीतून प्रत्यक्ष दिलासा मिळतो का, याकडे सर्वांचे लक्ष लागले आहे.
दरम्यान, शहर वाहतूक शाखेच्या उपायुक्तपदी नुकतीच डॉ. संदीप भाजीभाकरे यांची नियुक्ती झाली आहे. यापूर्वी त्यांनी मुख्यालय आणि विशेष शाखेत काम केले आहे. वाहतूक शाखेची जबाबदारी सांभाळताना स्थानिक वाहतूक समस्यांचा अभ्यास करून उपाययोजना राबविणे, वाहतूक पोलिसांची उपस्थिती वाढविणे, कोंडीच्या ठिकाणी तातडीने नियोजन करणे आणि नियमभंग करणाऱ्यांवर कठोर कारवाई करणे ही त्यांच्यासमोरील प्रमुख आव्हाने असणार आहेत.
