पुणे : पाण्याअभावी संकटात सापडलेल्या रब्बी हंगामातील उभ्या पिकांना दिलासा देण्यासाठी खडकवासला प्रकल्पाचे रब्बी आवर्तन नियोजित वेळेआधीच सुरू करण्याचा निर्णय जलसंपदा विभागाने घेतला आहे. त्यानुसार आज शुक्रवारपासून (ता. 25) पाणी सोडण्यात येणार असून हे आवर्तन तब्बल 45 दिवस सुरू राहणार आहे.
शेतकरी आणि लोकप्रतिनिधींकडून आवर्तन लवकर सुरू करण्याची मागणी सातत्याने केली जात होती. पिकांचे नुकसान टाळण्यासाठी या मागणीची दखल घेत जलसंपदामंत्री तथा कालवा सल्लागार समितीचे अध्यक्ष राधाकृष्ण विखे-पाटील यांच्या परवानगीने आवर्तन सुरू करण्याचे आदेश देण्यात आले आहेत.
खडकवासला पाटबंधारे विभागाचे कार्यकारी अभियंता किरण देशमुख यांनी ही माहिती दिली. सध्या शेतातील उभी पिके पाण्याअभावी संकटात असून, वेळेत पाणी उपलब्ध झाल्यास पिकांचे संभाव्य नुकसान टाळण्यास मदत होणार आहे. त्यामुळे खडकवासला प्रकल्पाच्या आवर्तनाकडे लाभक्षेत्रातील शेतकऱ्यांचे लक्ष लागले असून, वेळेआधी सुरू होणाऱ्या या आवर्तनामुळे रब्बी पिकांना मोठा आधार मिळणार आहे.
