नाशिक : कथित भोंदूबाबा अशोक खरात प्रकरणामुळे संपूर्ण महाराष्ट्रात मोठी खळबळ उडाली आहे. या प्रकरणी अशोक खरात सध्या न्यायालयीन कोठडीत असून, त्याच्या पत्नी कल्पना खरातला न्यायालयाने सशर्त जामीन मंजूर केला आहे. दरम्यान, या संपूर्ण प्रकरणाला सर्वात आधी समोर आणणारे पत्रकार दत्तात्रय खेमनार यांच्यावरच आता गंभीर गुन्हे दाखल झाल्याने या प्रकरणाला वेगळे वळण मिळाले आहे.
मिळालेल्या माहितीनुसार, श्रीरामपूर जवळील लोणी पोलीस ठाण्यात एका महिला ग्रामपंचायत अधिकाऱ्याने दिलेल्या तक्रारीवरून पत्रकार खेमनार यांच्याविरोधात गुन्हा नोंदवण्यात आला आहे. त्यांच्यावर 1 लाख रुपयांची खंडणी मागणे, जातीवाचक शिवीगाळ करणे आणि जीवे मारण्याची धमकी देणे असे गंभीर आरोप लावण्यात आले आहेत.
आपल्यावर दाखल झालेले सर्व आरोप पूर्णपणे खोटे आणि बनावट असल्याचा दावा दत्तात्रय खेमनार यांनी केला आहे. काही राजकीय पुढारी आणि ‘कॅप्टन’ खरात तसेच रुपाली चाकणकर यांच्या हस्तकांनी मिळून आपल्याविरुद्ध हे षडयंत्र रचल्याचा आरोप त्यांनी केला.
याशिवाय, 23 मार्च ते 20 सप्टेंबर दरम्यान मिळालेले पोलीस संरक्षण कोणतीही पूर्वसूचना न देता अचानक काढून घेण्यात आल्याचे त्यांनी सांगितले. यापूर्वी वाळू तस्कर, बेकायदेशीर खासगी सावकार आणि भोंदूगिरीविरोधात बातम्या प्रसिद्ध केल्यामुळे आपल्यावर 2 ते 3 वेळा जीवघेणे हल्ले झाले आहेत, असे त्यांनी स्पष्ट केले आहे . अजूनही आपल्या जीवाला मोठा धोका असल्याने पोलीस प्रशासनाने पोलीस संरक्षण त्वरित बहाल करावे आणि तक्रारीची पूर्ण शहानिशा करूनच पुढील कारवाई करावी, अशी मागणी खेमनार यांनी पोलीस अधीक्षकांकडे पत्राद्वारे केली आहे.
