उरुळी कांचन : “ज्यांच्यासाठी दररोजचा दिवस हा जगण्याचा संघर्ष असतो, त्यांच्या चेहऱ्यावर हक्काच्या वस्तू मिळताच फुललेला आनंद हीच आमच्या कामाची खरी पावती आहे. “या भावनेची प्रचिती उरुळी कांचन (ता. हवेली) येथील कस्तुरी ग्रुपच्या वतीने उभारण्यात आलेल्या ‘भिंत कस्तुरीची’ या सामाजिक उपक्रमातून पुन्हा एकदा आली आहे.
मागील काही वर्षांपासून सातत्याने समाजोपयोगी काम करणाऱ्या कस्तुरी ग्रुपच्या ‘भिंत कस्तुरीची’ या उपक्रमाला परिसरात दाखल झालेल्या ऊसतोड कामगारांच्या टोळीने या उपक्रमाला भेट दिली. एखाद्या अद्ययावत शॉपिंग मॉलमध्ये मोकळेपणाने खरेदी करावी, तशाच आनंदाने आणि अभिमानाने या कामगारांनी आपल्या गरजेनुसार कपडे, संसारोपयोगी भांडी आणि चपलांची निवड केली.
कडक उन्हात आणि अहोरात्र कष्ट उपसणाऱ्या ऊसतोड कामगारांच्या आयुष्यात अशा प्रकारे आनंदाचे क्षण निर्माण झाल्याने उपस्थित सर्वच जण भावूक झाले होते. केवळ मदत म्हणून न देता, गरजू व्यक्तीला सन्मानाने स्वतःच्या आवडीची वस्तू निवडण्याचा हक्क या उपक्रमाद्वारे दिला जातो.
दात्यांनी दिलेल्या वस्तू जेव्हा थेट अशा खऱ्या गरजूंपर्यंत पोहोचतात आणि त्यांच्या चेहऱ्यावर हसू फुलवतात, तेव्हा ‘टीम कस्तुरी’च्या मेहनतीचे सार्थक झाल्याची भावना सदस्यांनी व्यक्त केली. “दात्यांचे औदार्य आणि टीम कस्तुरीचे नियोजन यामुळेच हा माणुसकीचा यज्ञ अविरत सुरू आहे. ज्या डोनर्समुळे हे सर्व शक्य झाले, त्या सर्वांचे कस्तुरी ग्रुपच्या वतीने आभार मानण्यात आले. कस्तुरी ग्रुपच्या या संवेदनशील उपक्रमाचे आणि ऊसतोड कामगारांना दिलेल्या या अनमोल आनंदाचे संपूर्ण परिसरातून कौतुक होत आहे.
