पुणे : महाराष्ट्रातील मुदत संपणाऱ्या 3 पदवीधर आणि 2 शिक्षक अशा एकूण 5 विधानपरिषद जागांसाठी निवडणूक कार्यक्रम जाहीर झाला आहे. या निवडणुकीसाठी मतदार नोंदणीची अंतिम मुदत 26 सप्टेंबर 2026 ही होती. लवकरच यासंदर्भातील अधिकृत अधिसूचना प्रसिद्ध केली जाणार आहे.या निवडणुकीच्या निमित्ताने विशेषतः पुणे पदवीधर आणि पुणे शिक्षक मतदारसंघात राजकीय घडामोडींना वेग आला आहे.
पुणे पदवीधर आणि पुणे शिक्षक मतदारसंघातील निवडणुकीवर,उच्च शिक्षणमंत्री चंद्रकांत पाटील यांनी सांगितले की, हे दोन्ही मतदारसंघ पारंपरिकदृष्ट्या भाजपचेच राहिले आहेत. तरीही मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या बैठकीत अंतिम निर्णय घेतला जाईल. शीर्ष नेतृत्व जो निर्णय घेईल तो सर्वांना मान्य असेल आणि महायुतीचे दोन्ही अधिकृत उमेदवार येत्या दोन दिवसांत जाहीर होतील,असे त्यांनी स्पष्ट सांगितले.
दुसरीकडे, उमेदवारी मिळवण्यासाठी विविध नेत्यांनी मोर्चेबांधणी सुरू केली आहे. एकनाथ शिंदे यांच्या शिवसेनेकडून मंगेश चिवटे यांनी पुणे शिक्षक मतदारसंघासाठी दावा केला आहे, तर सचिन सानप आणि कौस्तुभ गावडे यांनीही तयारी दर्शवली आहे. त्याचसोबत महाविकास आघाडी या निवडणुकांमध्ये कोणाला संधी देते, याकडे सर्वांचे लक्ष लागले आहे.ठरलेल्या वेळापत्रकानुसार 23 ऑक्टोबर रोजी मतदान पार पडणार असून 27 ऑक्टोबर रोजी मतमोजणी आणि निकाल घोषित केले जाणार आहेत.
2020 मध्ये झालेल्या गेल्या निवडणुकीत तत्कालीन सत्ताधारी महाविकास आघाडीने या दोन्ही जागांवर विजय मिळवला होता. त्यावेळी राष्ट्रवादी काँग्रेसचे अरुण लाड पुणे पदवीधरमधून, तर काँग्रेसचे जयंत आसगावकर पुणे शिक्षक मतदारसंघातून विजयी झाले होते. मात्र, आता राज्यातील राजकीय परिस्थिती पूर्णपणे बदलली असून शिवसेना आणि राष्ट्रवादी काँग्रेसमध्ये दोन गट पडले आहेत. त्यामुळे या बदललेल्या राजकीय वातावरणात रंगणाऱ्या विधानपरिषद निवडणुकीच्या निकालाकडे संपूर्ण राज्याचे लक्ष लागले आहे.
