पुणे : पुण्यातील बिबवेवाडी परिसरातून एक अत्यंत धक्कादायक प्रकार समोर आला आहे. केवळ नावाने हाक मारल्याच्या क्षुल्लक कारणावरून एका तरुणाला मित्रांकडून अमानुष मारहाण करण्यात आली आहे . या घटनेत ओंकार शाहूराज जाधव (वय 27) हा तरुण गंभीर जखमी झाला आहे.
मिळालेल्या माहितीनुसार, ओंकार हा दुचाकीवरून घरी जात असताना बकुळ हॉलजवळ उत्तम नावाच्या ओळखीच्या तरुणाने त्याला अडवले. ओंकारने त्याला नावाने हाक मारताच उत्तम प्रचंड चिडला. “मला नावाने हाक का मारलीस? मला ‘भाऊ’च म्हणायचे, माझ्यापेक्षा मोठे व्हायचे नाही,” असे ओरडत त्याने ओंकारच्या कानशिलात लगावली. एवढ्यावरच न थांबता उत्तमने सोबत असलेला आपला पाळीव कुत्रा ओंकारच्या अंगावर सोडला. या कुत्र्याने ओंकारच्या दोन्ही पायांचा जबर चावा घेतला.
त्यानंतर आरोपी उत्तमने त्याचे साथीदार निलेश कुडले, मनीष शेळके आणि एका अनोळखी व्यक्तीला बोलावून घेतले. या सर्वांनी मिळून ओंकारला बळजबरीने कारमध्ये डांबले आणि बेदम मारहाण केली. या दरम्यान उत्तमने ओंकारच्या कपाळावर, हातावर आणि मांडीवर अनेक ठिकाणी स्वतः दातांनी चावे घेतले. तर निलेशने ओंकारच्या खिशातील 34,500 रुपये काढून घेतले. या अमानुष मारहाणीत ओंकारच्या नाकाचे हाड फ्रॅक्चर झाले आहे.
त्यानंतर आरोपींनी त्याला पापळ वस्ती येथील गणपती मंदिराजवळ गाडीतून बाहेर ओढले आणि बांबूने पुन्हा मारहाण केली. हा भांडणाचा प्रकार पाहून सोडवण्यासाठी पुढे आलेल्या एका मध्यस्थालाही आरोपींनी “तुझ्या घरावर कोयते फिरवून तुला संपवून टाकीन” अशी उघड धमकी दिली.
या भयानक प्रकारानंतर पीडित तरुण ओंकारने बिबवेवाडी पोलीस ठाण्यात धाव घेत तक्रार नोंदवली आहे. पोलीस या प्रकरणाचा पुढील तपास करत आहेत.
