पुणे : पुण्यात एमपीएससी परीक्षेतील गैरप्रकार, पेपरफुटी आणि रखडलेल्या पदभरतीविरोधात गेल्या तीन दिवसांपासून विद्यार्थ्यांचे जोरदार आंदोलन सुरू आहे. राष्ट्रवादी काँग्रेसचे (शरद पवार गट) आमदार रोहित पवार यांच्या नेतृत्वाखाली चाललेल्या या ‘सत्याग्रह’ आंदोलनाला आता राज्य आणि राष्ट्रीय पातळीवरून मोठा पाठिंबा मिळत आहे.लोकसभेचे विरोधी पक्षनेते राहुल गांधी यांनीही सोशल मीडियाद्वारे या आंदोलनाला आपला पूर्ण पाठिंबा जाहीर केला आहे.
राहुल गांधी यांनी आपल्या पोस्टमध्ये नमूद केले की, “पुण्यातील ‘छात्रों की गूँज’ या कार्यक्रमादरम्यान महाराष्ट्रातील विद्यार्थ्यांनी पेपरफुटी, रखडलेली भरती, महागडे शिक्षण, वसतिगृहांची दुरवस्था आणि DBT मधील अनियमितता अशा अनेक समस्या मांडल्या होत्या. यासंदर्भात मुख्यमंत्री देवेंद्र फडणवीस यांना एमपीएससीच्या कारभारात पारदर्शकता आणून विद्यार्थ्यांचे ऐकण्याचे आवाहन केले होते, परंतु तरीही कोणतीही सुधारणा झाली नाही. त्यामुळेच आज तरुण रस्त्यावर उतरून सत्याग्रह करत आहेत.”
विद्यार्थ्यांच्या मागण्या रास्त असल्याचे सांगत राहुल गांधी यांनी स्पष्ट केले की, तरुणांना केवळ आश्वासने नको असून ठोस कृती हवी आहे. महाराष्ट्र स्पर्धा परीक्षा समन्वय समितीने सुरू केलेल्या या आंदोलनात युवक काँग्रेस आणि NSUI चे कार्यकर्ते सातत्याने सहभागी होत आहेत. विद्यार्थ्यांचे भविष्य ज्या संस्थेवर अवलंबून आहे, तेथे पारदर्शकता येईपर्यंत आणि मागण्या पूर्ण होईपर्यंत ही लढाई सुरूच राहील, असा इशारा त्यांनी सरकारला दिला आहे.
विद्यार्थ्यांच्या मुख्य मागण्या:
एमपीएससीचे अध्यक्ष विवेक भीमनवार यांनी तात्काळ राजीनामा द्यावा आणि त्यांच्या जागी प्रामाणिक अधिकाऱ्याची नेमणूक करावी.
शासकीय विभागांमधील 70,000 पेक्षा जास्त रिक्त पदे तातडीने भरावीत.
परीक्षा पद्धती आणि एकूण भरती प्रक्रिया पूर्णपणे पारदर्शक करावी
