सातारा : तालुक्यातील नाळेवाडी (न्हाळेवाडी) गावात बिबट्याच्या हल्ल्यात 26 महिन्यांच्या चिमुरड्याचा दुर्दैवी मृत्यू झाला असून या घटनेमुळे संपूर्ण परिसरात तीव्र शोक व भीतीचे वातावरण पसरले आहे. जय संदीप खंडागळे असे प्राण गमावलेल्या बालकाचे नाव आहे.
मिळालेल्या माहितीनुसार, नाळेवाडी परिसरात गेल्या 3 महिन्यांपासून बिबट्याचा वावर होता. संध्याकाळी वीजपुरवठा खंडित झालेला असताना लहानगा जय घराबाहेर खेळत होता. अंधाराचा फायदा घेऊन बिबट्याने अचानक त्याच्यावर हल्ला केला आणि त्याला उचलून उसाच्या शेताच्या दिशेने 500 मीटर ओढत नेले. ग्रामस्थांनी आरडाओरडा करत बिबट्याचा पाठलाग केला. लोकांच्या गोंधळामुळे बिबट्याने बालकाला सोडले अन् पळ काढला, मात्र गंभीर जखमी झाल्यामुळे डॉक्टरांनी जयला रुग्णालयात मृत घोषित केले.
नाळेवाडी, शिवथर, मालगाव आणि कोलवडी परिसरातील नागरिकांनी बिबट्याबाबत वनविभागाकडे आधीच तक्रारी केल्या होत्या. मात्र प्रशासनाच्या दुर्लक्षामुळेच हा निष्पाप बालकाचा जीव गेल्याचा आरोप करत ग्रामस्थांनी तीव्र संताप व्यक्त केला आहे. घटनेची माहिती मिळताच सातारा तालुका पोलीस आणि वनविभागाचे पथक घटनास्थळी दाखल झाले. पोलीस निरीक्षक निलेश तांबे यांनी दिलेल्या माहितीनुसार, वनविभागाने बिबट्याला लवकरात लवकर पिंजरा लावून जेरबंद करण्याचे आश्वासन दिले आहे. याशिवाय पोलीस आणि वरिष्ठ अधिकारी या प्रकरणाची चौकशी करत आहेत.
या दुर्दैवी घटनेवर राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष शशिकांत शिंदे यांनी तीव्र दुःख व्यक्त केले. त्यांनी मृत जयला श्रद्धांजली अर्पण करत पीडित खंडागळे कुटुंबाला शासनाकडून तातडीने आर्थिक मदत देण्याची मागणी केली. तसेच डोंगराळ भागातील नागरिकांनी सतर्क राहावे आणि वन्यप्राणी दिसल्यास तात्काळ प्रशासनाला कळवावे, असे आवाहन त्यांनी केले. सातारा तालुका पंचायत समिती सदस्य राजेश पवार यांनीही घटनास्थळाला भेट देऊन परिस्थितीची पाहणी केली. सध्या नाळेवाडी परिसरात बिबट्याचा तात्काळ बंदोबस्त करण्याची जोरदार मागणी होत आहे.
