लोणी काळभोर : आजीच्या खोलीत जाऊन एका 23 वर्षीय तरुणाने घराच्या लोखंडी अँगलला दोरीच्या सहाय्याने गळफास घेऊन आत्महत्या केल्याची धक्कादायक घटना घडली आहे. हि घटना लोणी काळभोर (ता. हवेली) ग्रामपंचायत हद्दीतील रायवाडी परिसरात शनिवारी (ता. 26) घडली असून सकाळी दहाच्या सुमारास उघडकीस आली. या घटनेमुळे परिसरात हळहळ व्यक्त होत आहे.
ओंकार भास्कर काळभोर (वय २३) असे आत्महत्या केलेल्या तरुणाचे नाव आहे. याप्रकरणी आकाश सुरेश काळभोर यांनी लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, ओंकार हा आजीच्या खोलीत गळफास घेतलेल्या अवस्थेत नातेवाईकांना आढळून आला.
या घटनेची माहिती मिळताच लोणी काळभोर पोलीस ठाण्याच्या पोलीस उपनिरीक्षक अनुराधा मेहेर, पोलीस हवालदार प्रताप देवकर व त्यांच्या सहकाऱ्यांनी तातडीने घटनास्थळी धाव घेतली. पोलिसांनी नागरिकांच्या मदतीने ओंकारला खाली उतरवून तातडीने लोणी काळभोर येथील विश्वराज रुग्णालयात उपचारासाठी दाखल केले. मात्र, डॉक्टरांनी तपासणीपूर्वीच त्याचा मृत्यू झाल्याचे घोषित केले.
दरम्यान, पोलिसांनी मृतदेह ताब्यात घेऊन शवविच्छेदनासाठी पुण्यातील रुग्णालयात पाठविला आहे. शवविच्छेदन अहवालानंतर मृत्यूचे नेमके कारण स्पष्ट होण्याची शक्यता आहे. मात्र, ओंकारने एवढे टोकाचे पाऊल का उचलले, याचे कारण अद्याप स्पष्ट झालेले नाही. याबाबत लोणी काळभोर पोलीस अधिक तपास करीत आहेत.
