शिरूर: रांजणगाव ते सोने सांगवी पठार या रस्त्यावर भरधाव वेगाने आलेल्या पिकअप वाहनाने दुचाकीला समोरून जोरदार धडक दिल्याने झालेल्या भीषण अपघातात दीपक राजेश थोरात (वय २२,रा.टाकळी हाजी,शिंदे वस्ती,ता.शिरूर)या तरुणाचा मृत्यू झाला.हा अपघात शनिवार (ता.२९ ) रात्री आठच्या सुमारास सोने सांगवी पठार परिसरात झाला.
याबाबत वैभव शिवाजी शिंदे(वय २९,व्यवसाय सलून,रा.टाकळी हाजी, शिंदे वस्ती,ता.शिरूर, जि.पुणे) यांनी रांजणगाव एमआयडीसी पोलीस ठाण्यात फिर्याद दाखल केली आहे. त्यानुसार पिकअप वाहन क्रमांक एमएच १२ झेड यू ४४१५ वरील चालक संजय सदाशिव वाळके (वय ३९,रा.लोणी काळभोर,माळी मळा,ता.हवेली,जि.पुणे) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, दीपक थोरात हा हिरो स्प्लेंडर मोटारसायकल(एमएच १२ यूवाय ७११२) वरून रांजणगावकडून सोने सांगवीच्या दिशेने जात होता. त्यावेळी समोरून आलेल्या पिकअप चालकाने वाहन भरधाव वेगाने व निष्काळजीपणे चालवून वाहतूकीच्या नियमांकडे दुर्लक्ष केले. असे फिर्यादीत नमूद करण्यात आले आहे.तसेच चालकाने मद्यप्राशन केले असल्याचा आरोपही फिर्यादीत करण्यात आला असल्याचे पोलिसांनी सांगितले आहे.
या धडकेत दीपक थोरात यांच्या तोंडाला,डोक्याला तसेच डाव्या हाताला व डाव्या पायाला गंभीर दुखापत झाली.मोठ्या प्रमाणात रक्तस्त्राव झाल्याने त्यांचा मृत्यू झाला.अपघात इतका भयंकर होता की,या अपघातात दुचाकीची अवस्था अतिशय वाईट झाली असून,यावरून अपघाताचे भयंकर स्वरूप लक्षात येते.
या प्रकरणी रांजणगाव एमआयडीसी पोलीस ठाण्यात विविध कलमांच्या अंतर्गत तसेच मोटार वाहन कायद्यान्वये गुन्हा दाखल करण्यात आला आहे.
या अपघाताचा पुढील तपास रांजणगाव एमआयडीसी पोलीस करीत असून,अपघात नेमका कशामुळे झाला,वाहनचालकाने मद्यप्राशन केले होते का? आणि अपघाताच्या इतर कारणांचा पोलीस तपास करीत आहेत.
