पुणे: पुण्यातील सुरक्षित वस्त्यांमध्ये चोरट्यांनी धुमाकूळ घातला असून नागरिकांची चिंता वाढली आहे. हडपसरमधील अमनोरा पार्क आणि लोहगाव या दोन महत्त्वाच्या भागांमध्ये दिवसाढवळ्या घरफोडीच्या घटना उघडकीस आल्या आहेत. या चोरट्यांनी तब्बल ७ लाख ९७ हजार रुपयांच्या ऐवजावर डल्ला मारला असून, पोलीस प्रशासन आता या टोळीच्या शोधात आहे.
हडपसरच्या अमनोरा पार्कसारख्या हाय-प्रोफाईल सोसायटीत चोरी झाल्याने खळबळ उडाली आहे. तक्रारदार महिला ११ जून रोजी सकाळी १० वाजता घराला कुलूप लावून बाहेर गेल्या होत्या. त्यांचा हाच वेळ चोरट्यांनी डल्ला मारला. घराचे कुलूप तोडून आत शिरलेल्या चोरट्यांनी बेडरूममधील लॉकर उघडून त्यातील सोन्याचे दागिने आणि रोख रक्कम असा एकूण ७ लाख ३८ हजार रुपयांचा मुद्देमाल लंपास केला. दुपारी १२ वाजता जेव्हा महिला घरी परतल्या, तेव्हा त्यांना चोरी झाल्याचे समजले.
अशाच प्रकारची दुसरी घटना लोहगावच्या खांदवेनगर परिसरातील पवार वस्तीत घडली. येथे राहणाऱ्या ३६ वर्षीय नागरिकाच्या घराचे कुलूप तोडून चोरटे आत शिरले. घरातील कपाटात ठेवलेले दागिने आणि रोख रक्कम असा ५९ हजार रुपयांचा माल चोरून चोरटे फरार झाले.
घरमालकांच्या घराबाहेर जाण्यावर या चोरांचे बारीक लक्ष होते, असा प्राथमिक अंदाज पोलिसांनी वर्तवला आहे. यामुळे पुणेकरांनी आपल्या घराच्या सुरक्षेबाबत अधिक सतर्क राहण्याची गरज निर्माण झाली आहे. या घटनेनंतर लोहगाव पोलीस ठाण्यात गुन्हा दाखल करण्यात आला असून, सीसीटीव्ही कॅमेऱ्यांच्या मदतीने चोरट्यांची ओळख पटवण्याचे काम सुरू आहे.
