यवत, (पुणे) : ट्रॅक्टर काढण्यासाठी दोरी न दिल्याच्या क्षुल्लक कारणावरून मजुराने 60 वर्षीय महिलेवर उसाच्या कोयत्याने हल्ला केल्याची घटना घडली आहे. तर मध्यस्थी करायला आलेल्या 80 वर्षांच्या वृद्ध आईलाही मारहाण करून तिचा हात फ्रॅक्चर केला आहे. केडगाव (ता. दौंड) ग्रामपंचायत ह्द्दीतील पाटील निंबाळकरवस्ती येथे शनिवारी (ता. 25) रात्री साडेअकरा वाजण्याच्या सुमारास ही घडली.
ज्ञानेश्वर उर्फ माऊली देवीदास राऊत (रा. काटेपिंपळगाव, ता. गंगापूर, जि. छत्रपती संभाजीनगर) असे मारहाण करणाऱ्या आरोपीचे नाव आहे. तर मंगल साधू मेमाणे (वय-60, रा. पाटील निंबाळकर वस्ती, केडगाव, ता. दौंड) असे हल्ला झालेल्या महिलेचे नाव आहे. याबाबत मेमाणे यांनी दिलेल्या तक्रारीनुसार आरोपी राऊत याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी मंगल मेमाणे या त्यांची आई ध्रुपदाबाई यांच्यासोबत पाटील निंबाळकर वस्ती येथे राहतात.शनिवारी रात्री साडेअकरा वाजण्याच्या सुमारास दोघी माय-लेकी घरात असताना, गावातील सोपान राऊत यांच्याकडे शेतमजूर म्हणून काम करणारा ज्ञानेश्वर उर्फ माऊली राऊत हा त्यांच्या घरासमोर आला.
त्याने पिण्यासाठी पाणी मागितल्याने मंगल यांनी त्याला घरातून पाणी आणून दिले. पाणी प्यायल्यानंतर आरोपीने, “माझा ट्रॅक्टर अडकला आहे, तो बाहेर काढण्यासाठी दोन दोऱ्या द्या,” अशी मागणी केली. यावेळी मेमाणे यांनी “माझ्याकडे दोऱ्या नाहीत,” असे सांगताच आरोपीने हातात असलेला उसाचा धारदार लोखंडी कोयता थेट मंगल यांच्या डोक्यात मारला.
मंगल यांनी स्वतःचा बचाव करण्यासाठी कोयता हाताने पकडण्याचा प्रयत्न केला, मात्र आरोपीने तो हिसकावून पुन्हा त्यांच्या डोक्यात जोरदार वार केला. डोक्याला गंभीर दुखापत होऊन रक्तस्त्राव होऊ लागल्याने त्यांनी आरडाओरडा केला. आरडाओरड्याने 80 वर्षांच्या वृद्ध आई ध्रुपदाबाई मेमाणे या मुलीला वाचवण्यासाठी घराबाहेर आल्या. आरोपीने त्यांच्यावरही कोयत्याने वार करत हाताबुक्क्यांनी बेदम मारहाण केली. या मारहाणीत वृद्ध आईच्या उजव्या हाताला गंभीर दुखापत होऊन हात पार फ्रॅक्चर झाला असल्याचे फिर्यादीत म्हटले आहे.
दरम्यान, या मारहाणीचा आवाज आणि गोंधळ ऐकून शेजारीच राहणारे मंगल यांचे भाऊ धोंडीबा मेमाणे हे तात्काळ घटनास्थळाकडे धावत आले. धोंडीबा यांना समोरून येताना पाहून आरोपी ज्ञानेश्वर राऊत याने कोयता तिथेच टाकून अंधाराचा फायदा घेत पसार झाला. सध्या दोघींवर केडगाव येथील खासगी रुग्णालयात उपचार सुरु आहेत.
