कोल्हापूर: कोल्हापूर जिल्ह्यातील गडहिंग्लज तालुक्यात कौटुंबिक वादातून धक्कादायक प्रकार घडला आहे. पत्नी माहेरी गेल्याच्या रागातून एका तरुणाने स्वतःच्या आजीसासूवर पेट्रोल फेकल्याने त्या गंभीररीत्या भाजल्या. या घटनेमुळे परिसरात खळबळ उडाली असून पोलिसांनी आरोपीला अटक केली आहे.
जखमी महिलेचे नाव सुलोचना पुंडलिक कदम (वय ६५) असे आहे. त्यांच्यावर गंभीर भाजल्यामुळे रुग्णालयात उपचार सुरू आहेत. या प्रकरणी नातजावई गुरुनाथ शशिकांत शिंदे (वय ३१, रा. चिंचेवाडी, ता. गडहिंग्लज) याच्याविरुद्ध जीवे मारण्याचा प्रयत्न केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, गुरुनाथ हा पत्नी प्रीती आणि त्यांच्या एका वर्षाच्या मुलासह चिंचेवाडी येथे राहत होता. पती-पत्नीमध्ये काही दिवसांपासून किरकोळ कारणांवरून वाद होत होते. त्यानंतर प्रीती आपल्या मुलासह आजीसासू सुलोचना कदम यांच्या हसूरसासगिरी येथील घरी राहण्यासाठी गेली होती. पत्नीला परत पाठवावे, यासाठी गुरुनाथ वारंवार फोन करत होता. मात्र, ती परत न आल्याने त्याने थेट सासर गाठले.
पत्नी माहेरीच राहण्यामागे सुलोचना कदम यांचाच हात असल्याचा संशय त्याने मनात धरला होता. त्यामुळे तो घरातून निघतानाच एका बाटलीत पेट्रोल घेऊन गेल्याचे तपासात समोर आले आहे. सकाळी सुमारे दहा वाजता तो हसूरसासगिरी येथील घरी पोहोचला आणि सुलोचना कदम यांच्याशी वाद घालू लागला.
त्यावेळी सुलोचना या चुलीसमोर भाकरी करत होत्या. वाद वाढताच संतापाच्या भरात गुरुनाथने त्यांच्या दिशेने पेट्रोल फेकले. चुलीतील आगीच्या संपर्कात येताच अचानक मोठा भडका उडाला आणि सुलोचना कदम यांना आगीने वेढले. या घटनेत त्यांच्या चेहऱ्यासह मान आणि शरीराचे इतर भाग मिळून सुमारे ४५ टक्के भाजले.
घटनेनंतर त्यांना तातडीने उपजिल्हा रुग्णालयात दाखल करण्यात आले. प्राथमिक उपचारानंतर अधिक उपचारासाठी त्यांना सीपीआर रुग्णालयात हलविण्यात आले. पोलिसांनी आरोपीला अटक केली असून या प्रकरणाचा पुढील तपास पोलीस निरीक्षक रमेश मोरे यांच्या मार्गदर्शनाखाली सुरू आहे.
