लोणीकंद, (पुणे) : भिमा नदीपात्रालगत असलेल्या शेतातील स्टार्टर बॉक्स फोडून दोन स्टार्टर, 90 फूट केबल आणि शेतीपंप असा तब्बल 62 हजार रुपयांचा मुद्देमाल अज्ञात चोरट्यांनी लंपास केला. सांगवी सांडस (ता. हवेली) येथे ही घटना 31 ऑगस्ट रोजी सकाळी दहाच्या सुमारास उघडकीस आली. याप्रकरणी सूर्यकांत बाळासाहेब लोले यांनी लोणीकंद पोलिस ठाण्यात तक्रार दिली आहे.
पोलिसांनी दिलेल्या माहितीनुसार, लोले यांच्या गट क्रमांक 313 मधील शेतीपंपाचा स्टार्टर बॉक्स भिमा नदीपात्रालगत आहे. 30 ऑगस्ट रोजी सायंकाळी सहा वाजता स्टार्टर बॉक्स व परिसर पाहण्यात आला होता. त्यानंतर 31 ऑगस्ट रोजी सकाळी दहाच्या सुमारास लोले हे स्टार्टर बॉक्सची पाहणी करण्यासाठी गेले असता तो उघडा असल्याचे दिसले. त्यातील दोन स्टार्टर आणि पंपाला जोडलेली सुमारे 90 फूट केबल गायब होती.
दरम्यान, शेजारील शेतकरी विलास पाबळे यांनी पाहणी केली असता त्यांचा 10 एचपी क्षमतेचा शेतीपंपही चोरीला गेल्याचे आढळले. परिसरात शोध घेऊनही साहित्य मिळून न आल्याने चोरी झाल्याची खात्री झाल्यानंतर लोले यांनी पोलिसांत तक्रार दाखल केली. चोरीस गेलेल्या मुद्देमालामध्ये 25 हजारांचा शेतीपंप, 30 हजारांचे दोन स्टार्टर आणि 7 हजारांची 90 फूट केबल, असा एकूण 62 हजार रुपयांच्या साहित्याचा समावेश आहे. लोणीकंद पोलिसांकडून अज्ञात चोरट्याचा शोध सुरू आहे.
