पुणे: पोस्ट ऑफिसच्या मंथली इनकम स्कीममध्ये (MIS) पैसे गुंतवून दरमहा ठरावीक उत्पन्न मिळवण्याची संधी आहे. विशेष म्हणजे, या योजनेत गुंतवणुकीचा कालावधी 5 वर्षांचा असून, मुदत पूर्ण झाल्यानंतर नियमानुसार मूळ रक्कम परत मिळते. त्यामुळे नियमित उत्पन्नाची गरज असलेल्या नागरिकांसाठी ही योजना एक पर्याय ठरू शकते. इंडिया पोस्टच्या अधिकृत माहितीनुसार, या योजनेवर सध्या वार्षिक 7.4% व्याजदर आहे.
15 लाखांच्या गुंतवणुकीवर दरमहा किती उत्पन्न?
या योजनेत किमान 1,000 रुपयांपासून खाते उघडता येते. एकट्या व्यक्तीला स्वतःच्या खात्यात जास्तीत जास्त 9 लाख रुपये, तर संयुक्त खात्यात 15 लाख रुपयांपर्यंत गुंतवणूक करता येते. संयुक्त खाते जास्तीत जास्त 3 प्रौढ व्यक्तींच्या नावाने उघडता येते. तसेच, 10 वर्षांवरील अल्पवयीन मुलालाही नियमानुसार स्वतःच्या नावाने खाते उघडता येते.
सध्याच्या 7.4% व्याजदरानुसार, संयुक्त खात्यात 15 लाख रुपये जमा केल्यास वर्षाला 1,11,000 रुपये व्याज मिळते. म्हणजेच दरमहा 9,250 रुपये उत्पन्न मिळू शकते. दुसरीकडे, एकट्या व्यक्तीने 9 लाख रुपये गुंतवल्यास वर्षाला 66,600 रुपये, म्हणजे दरमहा 5,550 रुपये व्याज मिळते. हे गणित सध्याच्या व्याजदरावर आधारित आहे.
या योजनेतून मिळणाऱ्या मासिक व्याजाचा वापर घरखर्च, मुलांची शाळेची फी, औषधोपचार किंवा इतर नियमित खर्चांसाठी करता येतो. मात्र, मिळणारे व्याज खर्च न करता बचत खात्यात ठेवले, तरी त्यावर MIS योजनेप्रमाणे अतिरिक्त व्याज मिळत नाही. दरम्यान, याविषयी तुम्ही अधिक माहिती घेऊ शकता.
