ओमकार भोरडे
तळेगाव ढमढेरे : शिरूर शहरातील पोद्दार पार्कीगमध्ये उभ्या असलेल्या चार ट्रकच्या तब्बल सात बॅटऱ्या रात्रीच्या सुमारास अज्ञात चोरट्यांनी चोरुन नेल्या होत्या. या घटनेमुळे शहरामध्ये मोठी खळबळ माजली होती. शिरूर पोलीस स्टेशनच्या गुन्हे शोध पथकाचे पोलिस हवालदार नाथसाहेब जगताप यांनी या चोरीचा छडा लावला आहे.
याबाबत घटनेबाबत तपास सुरू केला असता, तांत्रिक विश्लेषण व सीसीटीव्ही फुटेज तपासून पारधी वस्ती, पाण्याची टाकी शिरूर येथील एक संशयित आर्यन एअरपोर्स पवार (वय-१९) याला पोलिसांनी ताब्यात घेतलं आहे. त्याच्याकडे तपास केला असता त्याने सदर गुन्हा केल्याचे कबूल केले आहे. सदर गुन्ह्यातील चोरीला गेलेला माल शिरूर पोलिसांनी त्याच्याकडून जप्त केला आहे.
या गुन्ह्याचा तपास करण्यासाठी नाथसाहेब जगताप यांना शिरुर पोलिस स्टेशनचे पो. अंमलदार नितेश थोरात, रघुनाथ हाळनोर, पवन तायडे यांनी मदत केली. पोलिस निरीक्षक ज्योतीराम गुंजवटे यांच्या मार्गदर्शनाखाली सखोल तपास करून नाथसाहेब जगताप यांनी आरोपी गजाआड केल्याने त्यांच्यावर कौतुकाचा वर्षाव होत आहे.
