लोणी काळभोर, ता. 20 : हवेली तालुक्यात झपाट्याने वाढणारे नागरीकरण, औद्योगिक विस्तार, नवीन गृहप्रकल्प आणि वाढती लोकसंख्या लक्षात घेता भविष्यातील विजेची गरज भागविण्यासाठी स्वतंत्र ‘हवेली वीज वितरण विभाग’ निर्माण करण्यात यावा, अशी मागणी शिरूर-हवेलीचे आमदार ज्ञानेश्वर (माऊली आबा) कटके यांनी केली आहे. आजच्या विजेच्या गरजांपुरते मर्यादित न राहता पुढील २५ वर्षांचे नियोजन करून वीज वितरण यंत्रणा सक्षम करण्याची भूमिका त्यांनी मांडली.

यासंदर्भात आमदार कटके यांनी महावितरण पुणे परिमंडळाचे मुख्य अभियंता पंकज तगलपल्लेवार यांची भेट घेऊन चर्चा केली. मुळशी वीज वितरण विभागाचे विभाजन करून हवेलीसाठी स्वतंत्र विभाग स्थापन करण्याचा प्रस्ताव तयार करावा आणि तो तातडीने मंजुरीसाठी महावितरणच्या मुख्य कार्यालयातील प्रकाशगड (मुंबई) येथे पाठवावा, अशी मागणी त्यांनी केली.
हवेली तालुक्यातील वाढत्या वीज मागणीच्या पार्श्वभूमीवर अनेक पायाभूत प्रकल्प तातडीने पूर्ण करण्याची गरजही त्यांनी अधोरेखित केली. लोणी काळभोर येथील ईएचव्ही उपकेंद्राचे काम पूर्ण करणे, वाघोली परिसरातील प्रस्तावित दोन ईएचव्ही उपकेंद्रांची उभारणी, शिंदवणे सबस्टेशन कार्यान्वित करणे आणि पेरणे सबस्टेशनचे काम पूर्ण करण्याबाबत त्यांनी पाठपुरावा केला.

याशिवाय कोरेगाव मूळ आणि उरुळी कांचन येथे नवीन सबस्टेशन उभारणे, आवश्यक फीडर्सची निर्मिती करणे, प्रलंबित वीज जोडण्या तातडीने मंजूर करणे, तसेच शासनाच्या सौर ऊर्जा योजनांचा लाभ सर्वसामान्य नागरिक आणि गृहनिर्माण संस्थांना मिळवून देण्यासाठी कार्यवाही करण्याची मागणी करण्यात आली.
‘पुढील 25 वर्षांचा विचार आवश्यक’
आमदार माऊली आबा कटके म्हणाले, “हवेली तालुक्याचा झपाट्याने विस्तार होत असून आगामी काळात लोकसंख्या, औद्योगिक क्षेत्र आणि गृहप्रकल्पांची संख्या मोठ्या प्रमाणात वाढणार आहे. त्यामुळे केवळ आजच्या विजेच्या गरजांचा विचार करून चालणार नाही, तर पुढील 25 वर्षांचे नियोजन करणे आवश्यक आहे. नागरिकांना अखंडित आणि दर्जेदार वीजपुरवठा मिळावा, तसेच भविष्यात पायाभूत सुविधांचा अभाव निर्माण होऊ नये, यासाठी स्वतंत्र हवेली वीज वितरण विभागाची मागणी केली आहे.”







