पुणे : होर्मुजच्या सामुद्रधुनीतील वाढत्या संघर्षाच्या पार्श्वभूमीवर भारत सरकारने भारतीय जहाजे आणि खलाशांच्या सुरक्षेसाठी अत्यंत कडक पाऊले उचलण्यास सुरुवात केली आहे. इराण आणि अमेरिका यांच्यातील युद्धामुळे या जलमार्गावर मोठा तणाव निर्माण झाला असून, अनेक व्यापारी जहाजांना क्षेपणास्त्रांचे लक्ष्य बनवले जात आहे. नुकत्याच झालेल्या एका भीषण हल्ल्यात 24 भारतीय नागरिक असलेल्या जहाजाला लक्ष्य करण्यात आले होते. या घटनेचा तीव्र निषेध नोंदवत भारताने आपली ठाम भूमिका स्पष्ट केली आहे आणि सागरी सुरक्षा व्यवस्था अधिक भक्कम करण्याचा निर्णय घेतला आहे.

या गंभीर परिस्थितीचा आढावा घेण्यासाठी केंद्रीय बंदर, जहाजबांधणी आणि जलमार्ग मंत्री सर्बानंद सोनोवाल यांनी आपल्या मंत्रालयातील वरिष्ठ अधिकाऱ्यांची एक तातडीची बैठक बोलावली होती. भारतीय ध्वज असलेल्या आणि भारताशी संबंधित अशा एकूण 9 जहाजांवर सध्या संभाव्य धोका लक्षात घेता विशेष लक्ष ठेवले जात आहे. संवेदनशील सागरी क्षेत्रांवर अधिक बारकाईने नजर ठेवण्याचे आणि कोणत्याही धोक्याची पूर्वसूचना जहाजांपर्यंत तात्काळ कशी पोहोचवता येईल, यासाठी यंत्रणा सज्ज करण्याचे निर्देश मंत्र्यांनी दिले आहेत. यासोबतच शिपिंग कंपन्या आणि जहाज मालकांशी सतत संवाद साधून खलाशांच्या बचावकार्याचे नियोजन केले जात आहे.
कच्चे तेल आणि एलपीजी गॅसच्या पुरवठ्यासाठी होर्मुजचा मार्ग भारतासाठी अत्यंत महत्त्वाचा आहे. या युद्धजन्य परिस्थितीतही आतापर्यंत तब्बल 86 जहाजांनी या मार्गावरून प्रवास केला असून, इराणकडून भारतीय जहाजांना सुरक्षित मार्ग दिला जात असला तरी अलीकडच्या काळात हल्ल्यांचे प्रमाण वाढले आहे. व्यापारी जहाजांवरील आणि भारतीय कर्मचाऱ्यांवरील या हल्ल्यांबाबत भारताने तीव्र चिंता व्यक्त केली आहे.

दरम्यान परिस्थितीवर पूर्ण नियंत्रण ठेवण्यासाठी केंद्रीय मंत्र्यांनी आपल्या अधिकाऱ्यांना परराष्ट्र मंत्रालय, भारतीय दूतावास तसेच विविध आंतरराष्ट्रीय सागरी एजन्सींच्या सतत संपर्कात राहण्याच्या सूचना दिल्या आहेत, जेणेकरून भारतीय नागरिकांचे रक्षण केले जाऊ शकेल.







