उरुळी कांचन: पुणे-सोलापूर महामार्गावरील (Pune Accident) कोरेगाव मूळ (ता. हवेली) हद्दीतील (Pune News) इनामदारवस्ती येथे दुचाकीला अज्ञात वाहनाने दिलेल्या धडकेत एकाचा जागीच मृत्यू झाला आहे. तर एकजण किरकोळ जखमी झाला आहे. शुक्रवारी (ता. 07) पहाटे सव्वातीन वाजण्याच्या सुमारास हि घटना घडली आहे.

अविनाश अश्रुबा यादव (वय-32, रा. संभाजीनगर, बीड) असे अपघातात मृत्यू झालेल्या तरुणाचे नाव आहे. तर सूर्या सत्यनारायण दास (वय-19, सध्या रा. उरुळी कांचन, मूळ बिहार) असे जखमी झालेल्या तरुणाचे नाव आहे. याप्रकरणी उरुळी कांचन पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, अविनाश यादव व सूर्या दास हे उरुळी कांचन येथील एका हॉटेलमध्ये कामाला होते. दोघेही रात्री उशिरा उरुळी कांचन बाजूकडून पुण्याच्या बाजूकडे दुचाकीवर निघाले होते. यावेळी कोरेगाव मूळ हद्दीतील इनामदारवस्ती परिसरात अविनाश यादव हा दुचाकी चालवत होता. यावेळी चालवत असलेली दुचाकी महामार्गावर घसरली.

यावेळी सूर्या दास याला किरकोळ दुखापत झाली. यावेळी सूर्याने अविनाशच्या गाडीवर बसण्यास नकार दिला. यावेळी अविनाश हा दुचाकी सुरु करून पुण्याच्या बाजूकडे निघाला असता अज्ञात वाहनाने त्याला जोरदार धडक दिली. यामध्ये त्याचा जागीच मृत्यू झाला.
दरम्यान, या अपघाताची माहिती मिळताच कस्तुरी रुग्णवाहिकेचे संतोष झोंबाडे व माऊली लाड यांनी जवळच्या रुग्णालयात दाखल केले. मात्र उपचारापूर्वीच त्याचा मृत्यू झाल्याची माहिती डॉक्टरांनी दिली. याप्रकरणी उरुळी कांचन पोलीस ठाण्यात गुन्हा दाखल करण्यात आला असून पुढील कार्यवाही सुरु आहे. तपास उरुळी कांचन पोलीस करीत आहेत.







