न्हावरे: गेल्या दोन वर्षांपासून इनामगाव, मांडवगण फराटा आणि पिंपळसुटी परिसरात दहशत निर्माण करणाऱ्या नरभक्षक बिबट्याला अखेर वन विभागाच्या रेस्क्यू टीमने जेरबंद केले. इनामगाव परिसरातील नलगेमळा येथे आज(ता.२२)पहाटे पावणे चार वाजण्याच्या सुमारास ही महत्त्वपूर्ण कारवाई करण्यात आली.अखेर बिबट्या जेरबंद झाल्याने परिसरातील नागरिकांनी सुटकेचा निःश्वास टाकला आहे.
गेल्या दोन वर्षांपासून या परिसरात बिबट्याचा वावर वाढला होता. लहान मुले तसेच वयोवृद्ध व्यक्तींवर बिबट्याने हल्ले करून त्यांना भक्ष्य बनवल्याच्या घटनांमुळे नागरिकांमध्ये भीतीचे वातावरण निर्माण झाले होते. रात्रीच्या वेळी घराबाहेर पडणे, शेतात जाणे तसेच जनावरांची देखभाल करणेही नागरिकांसाठी धोकादायक बनले होते.
नरभक्षक बिबट्याचा बंदोबस्त करण्यासाठी वन विभागाकडून गेल्या अनेक दिवसांपासून विशेष मोहीम राबविण्यात येत होती. अखेर नलगेमळा परिसरात रेस्क्यू टीमने सापळा रचून आज (ता.२२) पहाटेच्या सुमारास बिबट्याला यशस्वीरीत्या जेरबंद केले.
श्रीनाथ चव्हाण यांच्या मार्गदर्शनाखाली समृद्धी खंडारे यांच्या नेतृत्वाखालील रेस्क्यू टीमने व वन विभागाच्या कर्मचाऱ्यांनी बिबट्याला पकडण्यासाठी अनेक दिवस अथक प्रयत्न केले. परिसरातील बिबट्याच्या हालचाली,ठसे आणि संभाव्य वावराच्या ठिकाणांचा अभ्यास करून रेस्क्यू टीमने नियोजनबद्ध पद्धतीने ही कारवाई केली.
बिबट्या जेरबंद झाल्याची माहिती समोर येताच इनामगावसह मांडवगण फराटा व पिंपळसुटी परिसरातील नागरिकांनी समाधान व्यक्त केले.दोन वर्षांपासून दहशतीच्या छायेत असलेल्या नागरिकांना अखेर मोठा दिलासा मिळाला आहे.मात्र,परिसरात आणखी बिबट्यांचा वावर आहे का,याबाबत वन विभागाने दक्षता घेऊन पुढील उपाययोजना कराव्यात,अशीही मागणी नागरिकांकडून होत आहे.
