अक्षय टेमगिरे
शिरूर : शिरूर शहरातील लाटेआळी आंबेडकर नगर परिसरात शुक्रवारी १८ सप्टेंबर सकाळी साडेसहाच्या सुमारास गोळीबाराची घटना घडल्याने शहरात खळबळ उडाली या घटनेत हरीश दादाभाऊ गंगावणे वय ३४, रा. कामाठीपुरा, शिरूर यांचा गोळी लागल्याने मृत्यू झाला असून या प्रकरणी शिरूर पोलिसांनी तिघांविरुद्ध खुनाचा गुन्हा दाखल केला आहे.
पोलिसांनी दिलेल्या माहितीनुसार, लाटेआळी आंबेडकर नगर येथे तोफिक अन्सारी यांच्या घरासमोरील रस्त्यावर सकाळी साडेसहाच्या सुमारास हा प्रकार घडला असून दोन लाख रुपये खिशातून काढल्याचा जाब विचारल्याच्या कारणावरून आरोपी आणि हरीश गंगावणे यांच्यात वाद झाला. यावेळी चिडलेल्या रोहित रवींद्र सोनवणे याने त्याच्याजवळील पिस्तुलातून हरीश गंगावणे यांच्या कानामागे मानेच्या उजव्या बाजूस गोळी झाडल्याचे फिर्यादीत नमूद करण्यात आले आहे.
या घटनेप्रकरणी अजिंक्य अंकुश जगताप वय २८, व्यवसाय कुरिअर डिलिव्हरी, रा. पाण्याची टाकी, शिरूर यांनी शिरूर पोलीस ठाण्यात फिर्याद दिली आहे.
या प्रकरणी रोहित रवींद्र सोनवणे रा. करडे, ता. शिरूर तसेच अनिकेत विलास गव्हाणे आणि आदित्य पवार दोघे रा. गव्हाणवाडी, ता. श्रीगोंदा, जि. अहिल्यानगर यांच्याविरुद्ध गुन्हा दाखल करण्यात आला आहे.
घटनेची माहिती मिळताच शिरूर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली पोलिसांनी तपासाला सुरुवात केला असून आरोपींच्या अटकेसाठी शिरूर पोलीस ठाण्याच्या तीन टीम तसेच स्थानिक गुन्हे शाखेची एक टीम रवाना करण्यात आली आहे.
आरोपींचा कसून शोध सुरू असून त्यांना लवकरात लवकर अटक करण्याची कार्यवाही सुरू असल्याची माहिती पोलिसांनी दिली आहे. या घटनेचा पुढील तपास सहाय्यक पोलीस निरीक्षक केनेकर करीत आहेत.
