पुणे :गेल्या काही दिवसांपासून चर्चेत आलेल्या दिशा सालियन प्रकरणावर शिंदेसेनेचे आमदार निलेश राणे यांनी मोठं विधान केल आहे.सीबीआयने मालवणी पोलिसांकडून कॉल डिटेल्स, टॉवर लोकेशन आणि मरणोत्तर पाहणी अहवाल मागवले असून एफआयआर नोंदवला आहे. आता याप्रकरणी पुढील तपास सीबीआयकडून केला जाईल. गुन्ह्यात सामील असणाऱ्या सर्वांवर कायद्यानुसार योग्य ती कारवाई झाली पाहिजे, असे सांगतानाच संशयित आरोपी कोण आहेत, हे तपासाअंतीच स्पष्ट होईल, असे त्यांनी स्पष्ट केले.
दिशा सालियन प्रकरणातील पुरावा सोपवण्याबाबत विचारले असता राणे म्हणाले की, वकील निलेश ओझा यांनी न्यायालयात महत्त्वाचे मुद्दे व पुरावे मांडले आहेत. या प्रकरणातील काही बाबी विसंगत असल्याने न्यायालयात त्यावर सविस्तर युक्तिवाद होईल. न्यायालयाने सीबीआयला हे प्रकरण पुन्हा उघडण्याचे निर्देश दिले असून, सादर पुराव्यांच्या आधारेच पुढील कायदेशीर पावले उचलली जातील.
याच प्रकरणात दिशा सालियानचे वडील सतीश सालियान हे वकील निलेश ओझा यांच्यासह वांद्रे येथील ‘मातोश्री’ बंगल्याबाहेर पोहोचले. आदित्य ठाकरे यांनी 7 दिवसांत जाहीर माफी मागावी, अन्यथा 50-00 कोटी रुपयांचा मानहानीचा दावा ठोकण्यात येईल, अशी नोटीस त्यांनी दिली. कलानगरच्या मुख्य प्रवेशद्वारावर आदित्य ठाकरे यांच्या वकिलांनी ही नोटीस स्वीकारली. या घडामोडीदरम्यान मातोश्रीबाहेर शिवसैनिकांची गर्दी जमल्याने काही काळ तणाव निर्माण झाला होता. सतीश सालियान यांनी आपल्या वकिलांना धमक्या दिल्याचा आरोप केला आहे.
दुसरीकडे, ठाकरेंच्या बाजूने आमदार वरुण देसाई यांनी हे सर्व आरोप फेटाळून लावत आदित्य ठाकरे यांच्यावरील सर्व दाव्यांना पूर्णपणे आधारहीन आणि तथ्यहीन म्हटले आहे.
