यवत : पुणे-सोलापूर महामार्गाजवळील बोरीभडक गावाच्या हद्दीत अवैध शस्त्रांसह फिरणाऱ्या एका सराईत गुन्हेगाराला यवत पोलिसांनी बेड्या ठोकल्या आहेत. आरोपीच्या ताब्यातून एक बेकायदेशीर गावठी बनावटीचे पिस्टल आणि एक जिवंत काडतूस, असा एकूण 25,100 रुपयांचा मुद्देमाल जप्त करण्यात आला आहे.
मिळालेल्या माहितीनुसार, 17 तारखेला रात्री 9.45 वाजण्याच्या सुमारास बोरीभडक परिसरात एक तरुण विनापरवाना शस्त्र घेऊन वावरत असल्याची पक्की बातमी पोलीस निरीक्षक संतोष तासगावकर यांना मिळाली होती. माहिती मिळताच पोलीस पथकाने तातडीने त्या ठिकाणी धाव घेऊन सापळा रचला. पोलिसांनी संशयित आरोपी ऋषभ रमेश बडेकर (वय 30, रा. बडेकरवस्ती, उरुळी कांचन, ता. हवेली, जि. पुणे) याला ताब्यात घेतले. त्याची झडती घेतली असता त्याच्याकडे गावठी कट्टा आणि जिवंत गोळी आढळून आली.
जिल्हाधिकाऱ्यांच्या शस्त्रबंदी आदेशाचे उल्लंघन केल्याप्रकरणी आणि बेकायदेशीरपणे हत्यार बाळगल्यामुळे आरोपीविरोधात यवत पोलीस ठाण्यात भारतीय हत्यार कायदा व महाराष्ट्र पोलीस कायद्यान्वये गुन्हा नोंदवण्यात आला आहे. पोलीस अंमलदार धीरज जाधव यांनी याबाबत तक्रार दिली असून, पोलीस हवालदार रॉकी देवकाते हे या प्रकरणाचा पुढील तपास करत आहेत.
आरोपी ऋषभ बडेकर हा मोक्का आणि खंडणीसारख्या गंभीर गुन्ह्यांमध्ये अडकलेला असून, यापूर्वी पुणे शहरातील लोणी काळभोर पोलीस ठाण्यात त्याच्यावर 3 गंभीर गुन्हे दाखल आहेत.
ही धडक कारवाई पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी बापुराव दडस व स्थानिक गुन्हे शाखेचे वरिष्ठ पोलीस निरीक्षक प्रमोद क्षीरसागर यांच्या मार्गदर्शनाखाली करण्यात आली. यामध्ये यवतचे पोलीस निरीक्षक संतोष तासगावकर, पोलीस उपनिरीक्षक मारोती मेतलवाड, तसेच हवालदार रॉकी देवकाते, संदीप देवकर, महेंद्र चांदणे, धीरज जाधव, मारुती बाराते, अमोल भुजबळ, प्रतीक जगताप, सचिन गुंड, दिनेश लोणकर आणि विनीत कुऱ्हाडे यांच्या पथकाने महत्त्वपूर्ण भूमिका बजावली.
यवत पोलीस ठाण्याच्या हद्दीत गुन्हेगारी आणि बेकायदेशीर शस्त्रांचा वावर खपवून घेतला जाणार नाही, असा इशारा पोलीस प्रशासनाने दिला आहे.
