पुणे : पुण्यासह राज्याच्या बहुतांश भागात गेल्या चार ते पाच दिवसांपासून उष्णतेचा जोर वाढला आहे. तापमानात झालेल्या वाढीमुळे स्थानिक पातळीवर ढग तयार होण्यासाठी अनुकूल वातावरण निर्माण झाले असून, पुढील दोन दिवस मेघगर्जना, विजांचा कडकडाट आणि वादळी वाऱ्यासह पाऊस पडण्याची शक्यता भारतीय हवामानशास्त्र विभागाने व्यक्त केली आहे.
हा पाऊस सर्वत्र एकसमान स्वरूपात पडणार नसून स्थानिक पातळीवर त्याची तीव्रता वेगवेगळी राहण्याची शक्यता आहे. काही ठिकाणी हलक्या सरी, तर काही भागांत तुलनेने जोरदार पाऊस होऊ शकतो. उत्तर मध्य महाराष्ट्र, मराठवाडा आणि विदर्भातील काही भागांत वादळी पावसाचा अंदाज आहे. पुणे शहर आणि जिल्ह्यातही अशाच प्रकारच्या पावसाची शक्यता आहे.
पुण्यात सलग दुसऱ्या दिवशी तापमानात वाढ नोंदविण्यात आली. शहरातील कमाल तापमान ३१.७ अंश सेल्सिअस, तर किमान तापमान २२.२ अंश सेल्सिअस होते. जिल्ह्यातील काही भागांत कमाल तापमान ३३ अंश सेल्सिअसच्या पुढे गेले आहे. सकाळपासून उन्हाचा तडाखा जाणवत असून पहाटे आणि रात्रीचा गारवाही कमी झाला आहे.
या पार्श्वभूमीवर सोमवार आणि मंगळवारी विशेषतः संध्याकाळनंतर मेघगर्जना, विजांचा कडकडाट आणि हलक्या पावसाच्या सरींची शक्यता आहे. दरम्यान, बंगालच्या उपसागरात कमी दाबाचे क्षेत्र विकसित होत आहे. ही प्रणाली महाराष्ट्राच्या दिशेने सरकल्यास पुढील आठवड्यात राज्याच्या अधिक भागांत पावसासाठी अनुकूल वातावरण तयार होऊ शकते.
राज्यात १ जून ते १४ सप्टेंबर या कालावधीत सरासरीच्या तुलनेत सुमारे १६ टक्के पावसाची तूट नोंदविण्यात आली आहे. मराठवाड्यात ३६ टक्के, तर विदर्भात २४ टक्के पावसाची तूट आहे. मध्य महाराष्ट्र आणि कोकणातील काही भागांत पावसाची स्थिती समाधानकारक असली तरी अनेक भाग अजूनही चांगल्या पावसाच्या प्रतीक्षेत आहेत. पावसाच्या दीर्घ खंडामुळे शेतकऱ्यांची चिंताही वाढली आहे.
