पुणे : अन्नातील भेसळ आणि प्रतिबंधित उत्पादनांच्या जाहिरातींविरोधात अन्न व औषध प्रशासनाने (FDA) कठोर भूमिका घेतली आहे. नागरिकांच्या आरोग्याशी संबंधित नियमांचे उल्लंघन करणाऱ्यांवर कारवाई करताना कोणालाही विशेष सवलत दिली जाणार नाही, अशी भूमिका एफडीए आयुक्त तुकाराम मुंढे यांनी स्पष्ट केली आहे. याच पार्श्वभूमीवर त्यांनी बॉलिवूडमधील अभिनेता शाहरुख खान, अजय देवगण आणि टायगर श्रॉफ यांच्या प्रकरणावरही आपली भूमिका मांडली आहे.
‘विमल इलायची’च्या जाहिरातीप्रकरणी शाहरुख खान, अजय देवगण आणि टायगर श्रॉफ यांना एफडीएकडून कारणे दाखवा नोटीस बजावण्यात आली होती. एफडीएच्या म्हणण्यानुसार, या जाहिरातीच्या माध्यमातून महाराष्ट्रात प्रतिबंधित असलेल्या पानमसाल्याचे अप्रत्यक्ष किंवा सरोगेट प्रमोशन होत असल्याचा आक्षेप घेण्यात आला आहे. जाहिरात स्वीकारण्यापूर्वी संबंधित उत्पादनाबाबत कोणती पडताळणी करण्यात आली, याबाबत कलाकारांकडून स्पष्टीकरण मागवण्यात आले आहे.
या कारवाईबाबत बोलताना तुकाराम मुंढे यांनी सेलिब्रिटी असल्यामुळे कोणालाही कायद्यापासून वेगळी वागणूक मिळणार नसल्याचे स्पष्ट केले. संबंधित कलाकार मोठे सुपरस्टार असले तरी एफडीएसाठी ते जाहिरातदार आणि नियमांचे उल्लंघन झाल्याच्या प्रकरणातील संबंधित व्यक्ती असल्याची भूमिका त्यांनी मांडली. त्यामुळे या प्रकरणातील कायदेशीर प्रक्रिया पुढे सुरू राहणार असल्याचे त्यांनी सांगितले.
दरम्यान, अन्नभेसळीबाबत बोलताना मुंढे यांनी स्वतःचा एक अनुभवही सांगितला. मित्राच्या आग्रहावरून ते एका हॉटेलमध्ये जेवण्यासाठी गेले होते. तेथे त्यांनी पनीरची भाजी मागवली. मात्र, पनीर पाहिल्यानंतर ते अस्सल नसल्याचा त्यांना संशय आला. तपासणी केल्यानंतर ते खरे पनीर नसल्याचे लक्षात आल्याचे त्यांनी सांगितले.
अन्नपदार्थांच्या गुणवत्तेकडे बारकाईने लक्ष देण्याची सवय असल्याचे मुंढे यांनी या अनुभवातून स्पष्ट केले. नागरिकांच्या आरोग्याला धोका निर्माण करणाऱ्या भेसळयुक्त किंवा नियमबाह्य अन्नपदार्थांविरोधात कारवाई करणे हे एफडीएचे कर्तव्य असल्याचे त्यांनी सांगितले. प्रतिबंधित उत्पादनांच्या जाहिरातींच्या बाबतीतही नियमांचे पालन करणे आवश्यक असल्याची भूमिका त्यांनी मांडली.
