पुणे : पाण्याच्या टाकीजवळ कपडे धुण्यासाठी गेलेल्या 17 वर्षीय अल्पवयीन मुलीचा विनयभंग करणाऱ्या आरोपीला 3 वर्षे साध्या कारावासाची आणि 1 हजार रुपयांच्या दंडाची शिक्षा सुनावली आहे.
रमेश सखाराम दाभाडे असे शिक्षा सुनावलेल्या आरोपीचे नाव आहे. त्याच्यावर पोक्सो कायद्यांतर्गत गुन्हा दाखल करण्यात आला होता. त्यानुसार जुन्नरचे अतिरीक्त जिल्हा व सत्र न्यायालयाचे न्यायाधीश श्री. एस. बी. शेलार यांनी हे आदेश दिले आहेत. जुन्नर न्यायालयाने एकाच महिन्यात महिला अत्याचाराच्या दोन वेगवेगळ्या गुन्ह्यांत शिक्षा ठोठावल्याने समाजात एक कडक आणि सकारात्मक संदेश गेला आहे.
पोलिसांनी दिलेल्या माहितीनुसार, 11 जानेवारी 2020 दुपारी साडेबारा वाजण्याच्या सुमारास ओतूर पोलीस स्टेशनच्या हद्दीतील एक 17 वर्षीय अल्पवयीन मुलगी तिच्या घरापासून काही अंतरावर असणाऱ्या पाण्याच्या टाकीजवळ कपडे धुण्यासाठी गेली होती. ती कपडे धुत असताना, आरोपी रमेश दाभाडे याने तिच्या मनास लज्जा उत्पन्न होईल असे कृत्य करून तिचा विनयभंग केला. या प्रकाराने पिडीत मुलीने आरडाओरडा करत आपल्या आजोबांना आवाज देऊन बोलावले. आजोबांनी आरोपी रमेश दाभाडे याला जाब विचारला असता, आरोपीने उलट पिडीत मुलीला आणि तिच्या आजोबांना शिवीगाळ करत ‘जिवे मारून टाकीन’ अशी धमकी दिली होती.
घटनेनंतर पिडीत मुलीने ओतूर पोलीस स्टेशन गाठून फिर्याद दिली. त्यानुसार दाभाडे याच्याविरुद्ध ओतूर पोलीस ठाण्यात गुन्हा दाखल करण्यात आला होता. या गुन्ह्याचा तपास ओतूर पोलीस स्टेशनचे तत्कालीन प्रभारी अधिकारी पोलीस निरीक्षक पी. एच. कांबळे यांनी अत्यंत कौशल्याने तपासाची चक्रे फिरवून आरोपीविरुद्ध भक्कम आणि तांत्रिक व प्रत्यक्ष पुरावे गोळा केले आणि न्यायालयात परिपूर्ण दोषारोपपत्र (चार्जशिट) दाखल केले.
सदर गुन्ह्याची सुनावणी विशेष न्यायाधीश एस. बी. शेलार यांच्यासमोर झाली. सरकारी वकिलांनी मांडलेला युक्तिवाद आणि पोलिसांनी सादर केलेले सबळ पुरावे ग्राह्य धरून, न्यायालयाने गुरुवारी (ता. 25) आरोपी रमेश दाभाडे याला दोषी ठरवले. न्यायालयाने आरोपीला 3 वर्षे साधा कारावास आणि 1 अह्जर रुपये दंड ठोठावला. जर आरोपीने दंड न भरल्यास त्याला आणखी 6 महिने अतिरिक्त साधा कारावास भोगावा लागेल, असा आदेश न्यायालयाने दिला आहे.
दरम्यान, वरिष्ठांच्या मार्गदर्शनाखाली ओतूरचे प्रभारी अधिकारी सहाय्यक पोलीस निरीक्षक ज्ञानेश्वर बाजगीर, जिल्हा कोर्ट पैरवी अधिकारी पोलीस निरीक्षक संतोष घोळवे, अतिरिक्त सरकारी वकील जी. के. खोडे, कोर्ट पैरवी अधिकारी महिला पोलीस हवादार मनिषा ताम्हाणे, आणि महिला कर्मचारी पुजा औटी यांनी प्रभावी काम पाहिले. तसेच या गुन्ह्याचा मूळ तपास पोलीस निरीक्षक परशुराम कांबळे व पो. हवा. देविदास खेडकर यांनी केला होता.
दरम्यान, “कोर्टाने महीनाभरात महीला विरूध्दचे वेगवेगळया दोन गुन्हयात शिक्षा दिल्यामुळे समाजामध्ये चांगला संदेश गेला असुन गुन्हेगारामध्ये गुन्हा केल्यानंतर कठोर शिक्षा होते. याबाबत संदेश गेला आहे त्यामळे गन्हा करताना गन्हेगार दहा वेळा विचार करतील. अशा प्रतिक्रिया सुजाण नागरिकांमधून उमटत आहेत.
