लोणी काळभोर, ता. 5: ग्रामीण भाग असतानादेखील मागील 15 वर्षाच्या कालावधीत लोणी काळभोर (Loni Kalbhor News) (ता. हवेली) येथील विद्यार्थ्यांनी क्रीडा क्षेत्रात उत्युंग कामगिरी केलेली आहे. येथील विद्यार्थी कुस्ती, कबड्डी, खो-खो, वेटलिफ्टिंग, धावणे यांसह विविध स्पर्धांमध्ये चमकले असून जिल्ह्यात दबदबा निर्माण केला आहे. त्यातच आता पृथ्वीराज कपूर मेमोरियल हायस्कूलमधील (Prithviraj Kapoor High School in Loni Kalbhor) 17 वर्ष वयोगटातील विद्यार्थ्यांनी तालुकास्तरीय स्पर्धेत सुवर्ण कामगिरी करून प्रथम क्रमांक मिळविला आहे. त्यामुळे विद्यार्थ्यांचे व शाळेचे सर्वत्र कौतुक होत आहे.
महाराष्ट्र राज्य क्रीडा व युवक सेवा संचालनालय पुणे व जिल्हा क्रीडा अधिकारी कार्यालय पुणे यांच्यावतीने लोणीकंद (ता. हवेली) येथील सुभद्राबाई रामचंद्र भूमकर कॉलेजमध्ये नुकत्याच तालुकास्तरीय खो-खो स्पर्धा पार पडल्या. या स्पर्धेत तालुक्यातील 50 हून अधिक शाळांनी सहभाग घेतला आहे.
हेही वाचा: लोणी काळभोर येथील पोलिस पाटलांना ऊसतोड करणाऱ्या भावांनी घातला 5 लाखांचा गंडा
या स्पर्धेत शाळेचे 17 व 14 वर्ष वयोगटातील विद्यार्थ्यांचे संघ सहभागी झाले होते. पृथ्वीराज कपूर मेमोरियल हायस्कूलच्या 17 वर्ष वयोगटातील विद्यार्थ्यांचा अंतिम सामना हा लोणी काळभोर येथील इंग्लिश मीडियम स्कूल या संघासोबत झाला. हा सामना पृथ्वीराज कपूर मेमोरियल हायस्कूलच्या खेळाडूंनी एक डाव व सात गुणांनी जिंकला. या संघाची जिल्हास्तरीय स्पर्धेसाठी निवड झाली आहे.
दरम्यान, शाळेच्या 14 वर्ष वयोगटाचा, उपांत्य सामना ग्रामीण सर्वांगीण विकास शिक्षण संस्था कुंजीरवाडी या संघासोबत झाला. हा सामना सहा गुणांनी जिंकून 14 वर्षे वयोगटाच्या संघाने अंतिम सामन्यांमध्ये धडक मारली होती. परंतु, या संघाला अंतिम सामन्यात उपविजेते पदकावर समाधान मानावे लागले.
विजेत्या खेळाडूंना क्रीडाशिक्षक सुरेश कोरे, राजेश चौरे आणि सुनील टिळेकर यांचे बहुमुल्य मार्गदर्शन मिळाले. यशस्वी खेळाडूंचे विद्यालयाचे प्राचार्य सीताराम गवळी, उपप्राचार्य व्ही एम. शिंदे यांनी अभिनंदन करून पुढील वाटचालीसाठी हार्दिक शुभेच्छा दिल्या. यावेळी शाळेचे सर्व शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते.
तालुकास्तरीय खो-खो स्पर्धेत प्रथम आलेल्या खेळाडूंची नावे
आदेश पाटील, सोहम खामकर, रोहन खामकर, साहिल वडतीले, साई साळुंखे, सुनीत मोरे, प्रशांत खरात, ऋषिकेश साळुंखे, रुद्र तांदळे, आर्यन हालमे, आशुतोष लंगर, अरमान कोरबु, आर्यन तिकुडगे, कार्तिक खोचरे, संस्कार कोरे.
