लोणी काळभोर, ता. 10 : लोणी काळभोर आणि कदमवाकवस्ती (ता. हवेली) ग्रामपंचायत हद्दीत चोरट्यांनी तीन ठिकाणी घरफोड्या करून सोन्याचे दागिने, रोकड, लॅपटॉप व चांदीचे दागिने असा सुमारे साडेसात लाखांहून अधिक रुपयांचा मुद्देमाल लंपास केला. घरमालक बाहेरगावी असल्याची संधी साधून चोरट्यांनी घरांचे कुलूप तोडून चोरी केल्याने परिसरात खळबळ उडाली आहे.
पहिल्या घटनेत, बायडाबाई शिवाजी धावडे (वय 70, रा. वडाळे वस्ती, रायवाडी, लोणी काळभोर) यांच्या घराचे कुलूप तोडून चोरट्यांनी सुमारे चार टोळे सोन्याचे दागिने व 3 हजार रुपयांची रोकड असा 6 लाखांहून अधिक रुपये किंमतीचा मुद्देमाल चोरून नेला. महिला प्रकृती अस्वास्थ्यामुळे दोन दिवस मुलीकडे राहण्यासाठी गेल्या होत्या. 9 सप्टेंबर रोजी घरी परतल्यानंतर घराचे कुलूप तुटलेले आणि कपाटातील सामान अस्ताव्यस्त आढळले. तपासणी केल्यानंतर दागिने व रोकड असलेली पेटी चोरीला गेल्याचे समोर आले.
दुसऱ्या घटनेत, कदमवाकवस्तीतील स्टार सिटी परिसरात राहणारे उमेश सोनवणे हे कुटुंबासह बाहेरगावी गेले असताना चोरट्यांनी घराचे कुलूप तोडले. लोखंडी कपाटातून 15 हजार रुपयांची रोकड, सोन्याचे मणी व चांदीचे जोडवे, असा सुमारे 18 हजार 500 रुपयांचा ऐवज चोरीला गेला आहे.
तिसऱ्या घटनेत, कदमवाकवस्ती ग्रामपंचायत हद्दीतील गुजरवस्तीत राहणारे व्यावसायिक राजमाने हे शुक्रवारी (ता. 4 ) रात्री मूळगावी गेले होते. बुधवारी (ता. 10 ) रात्री त्यांच्या शेजाऱ्यांना घराचे कुलूप तुटलेले दिसून आले. त्यांनी तत्काळ राजमाने यांना माहिती दिली. घरी परतल्यानंतर तपासणी केली असता 78 हजार रुपये किमतीचा लॅपटॉप, 49 हजार रुपयांची रोकड आणि चांदीचे दागिने, असा दीड लाखांहून अधिक रुपयांचा मुद्देमाल चोरीला गेल्याचे आढळले.
दरम्यान, सलग तीन घरफोड्यांमुळे लोणी काळभोर-कदमवाकवस्ती परिसरातील नागरिकांमध्ये भीतीचे वातावरण निर्माण झाले असून, चोरट्यांचा बंदोबस्त करण्याचे आव्हान पोलिसांसमोर उभे राहिले आहे. या घटनांचा पुढील तपास लोणी काळभोर पोलिस करीत आहेत.
