पुणे : पुणे पोलिसांच्या कार्यपद्धतीवर महाराष्ट्र राज्य मानवाधिकार आयोगाने गंभीर आक्षेप नोंदवला आहे. हत्या प्रकरणातील अल्पवयीन आरोपींना वाहनाच्या बोनेटला बांधून सार्वजनिक ठिकाणी फिरवल्याचा आरोप तसेच दुसऱ्या प्रकरणात आरोपींना रस्त्यावर गुडघ्यावर बसवून आणि गुडघ्यांवर चालायला लावत मारहाण केल्याच्या घटनांची आयोगाने दखल घेतली आहे. या दोन्ही प्रकरणांमध्ये मानवाधिकारांचे उल्लंघन झाल्याचे आयोगाने नमूद केले आहे.
आरोपींशी अशा प्रकारे वागणे योग्य नसून, कायदेशीर प्रक्रियेचे पालन करणे आवश्यक असल्याचे आयोगाने स्पष्ट केले. विशेषतः अल्पवयीन आरोपींशी संबंधित प्रकरणात नियमांचे पालन न केल्याने पोलिसांच्या भूमिकेवर गंभीर प्रश्न उपस्थित झाले आहेत. आरोपींना सार्वजनिक ठिकाणी अपमानास्पद वागणूक देण्यात आल्याच्या आरोपामुळेही या प्रकरणाचे गांभीर्य वाढले आहे.
या प्रकरणात पुणे पोलिस आयुक्त अमितेशकुमार, पोलिस उपायुक्त मिलिंद मोहिते आणि सहायक पोलिस आयुक्त राहुल आवारे यांच्या भूमिकेवरही गंभीर निरीक्षण नोंदवले आहे. आरोपींशी अशा पद्धतीने वर्तन होण्यास संबंधित अधिकारी जबाबदार असल्याचे आयोगाने नमूद केले आहे.
घटनांची गंभीरता लक्षात घेऊन आयोगाने पुणे पोलिस आयुक्तांसह संबंधित अधिकाऱ्यांविरोधात गुन्हा दाखल करण्याची शिफारस पोलिस महासंचालकांकडे केली आहे. तसेच या प्रकरणाचा तपास पुणे पोलिसांच्या यंत्रणेकडे न ठेवता अतिरिक्त पोलिस महासंचालक किंवा त्यापेक्षा वरिष्ठ दर्जाच्या अधिकाऱ्याकडे सोपवण्याची शिफारसही करण्यात आली आहे.
