डॉ. अशोक बालगुडे
पुणे : रुग्णांच्या उपचारासाठी असलेल्या पुणे महापालिकेच्या रुग्णालयांच्या आणि दवाखान्यांच्या आवारांवर खासगी वाहनांनी अतिक्रमण केल्याचे चित्र समोर आले आहे. स्थानिक लोकप्रतिनिधी, राजकीय कार्यकर्ते, पदाधिकारी आणि काही रिक्षाचालक वाहने उभी करत असल्याने उपचारासाठी येणाऱ्या रुग्णांच्या नातेवाइकांना जागेसाठी शोधाशोध करावी लागत आहे. रुग्णवाहिकांसाठी आवश्यक जागाही मोकळी राहण्याचा प्रश्न निर्माण झाला आहे.
येरवडा येथील राजीव गांधी रुग्णालयात ही समस्या गंभीर झाली असून, रुग्णालयप्रमुखांनी यापूर्वीच महापालिकेच्या आरोग्य विभागाला पत्र देऊन लक्ष वेधले होते. महाराष्ट्र गृहनिर्माण मंडळ परिसरातील नागपूर चाळ येथील छत्रपती शिवराय दवाखान्याच्या आवारातही खासगी वाहने उभी केली जात असल्याचे निदर्शनास आले आहे.
रुग्णालयातील वाहनांना रोखण्याचा प्रयत्न करणाऱ्या सुरक्षारक्षकांशी काही वाहनचालक वाद घालत असल्याचेही समोर आले आहे. राजकीय संबंधांचा दबाव असल्यास कारवाई करणे अधिक कठीण होते. त्यामुळे रुग्णालय परिसरातील वाहनव्यवस्थापनावर नियंत्रण कोणाचे, असा प्रश्न उपस्थित होत आहे.
रुग्णालयांचा परिसर हा रुग्णसेवेसाठी आहे, खासगी वाहनांच्या कायमस्वरूपी तळासाठी नव्हे. महापालिकेने अधिकृत वाहनतळ निश्चित करावेत, रुग्णवाहिकांसाठी स्वतंत्र जागा मोकळी ठेवावी आणि नियम मोडणाऱ्यांवर कोणताही मुलाहिजा न ठेवता कारवाई करावी. रुग्णालयाच्या दारात वाहनांना जागा मिळत नसेल, तर रुग्णसेवेच्या प्राधान्यक्रमावरच प्रश्नचिन्ह उभे राहते.
